सिराज खान
नेपालगन्ज, भदौ ३० गते । यहाँस्थित नेपाल भारत सीमा नाका पूर्णरूपमा सञ्चालनमा आएको छ । केही दिन बन्द रहेको नाका सोमबारदेखि पूर्णरूपमा खुलेको हो ।
जेनजी प्रदर्शनका कारण केही दिन बन्द गरिएको र पछि आंशिक रूपमा सञ्चालन गरिएको नेपाल भारत जमुनाहा सीमा नाका आजबाट पूर्णरूपमा खुलेको दुबै देशका सुरक्षा अधिकारीहरूले जनाएका छन् ।
आजबाट नाका पूर्णरूपमा खोलिएको जनाउँदै भारत रुपैडिहास्थित भारतीय सुरक्षा निकाय एसएसबीका निरीक्षक ऋतुराजले अब नाकामा कुनै प्रकारको समस्या नरहेको बताउनुभयो ।
उहाँले भारतबाट नेपाल जाने नेपाली यात्रुलाई सुरुबाटै जान दिइएको जनाउँदै तर अहिले आएर दुबै देशका नागरिकलाई पूर्णरूपमा आवागमन गर्न दिइएको बताउनुभयो ।
यसअघि भारतले बिरामी, एम्बुलेन्स तथा अन्य आपातकालीन अवस्थाका नेपाली नागरिकलाई मात्र भारत प्रवेश गर्न दिएको थियो, भने भारतीय नागरिकलाई नेपाल आउन दिएको थिएन ।
नेपालतर्फको अवस्था सामान्य भएर जनजीवन पुरानै लयमा फर्किसकेपछि जमुनाहा नाका पूर्णरूपमा सुचार गरिएको इलाका प्रहरी कार्यालय जमुनाहाले पनि जनाएको छ ।
भारतबाट स्वदेश फर्किएका नेपालीहरूले अहिले आवागमनमा कुनै पनि समस्या नरहेको जनाउँदै परिचयपत्र हेरेर सहज रूपमा आवागमन गर्न दिइरहेको जनाएका छन् ।
देशभरि जेनजीले प्रदर्शन सुरु गरेपछि केन्द्रको आदेश जनाउँदै भारतीय सुरक्षाकर्मीले सीमा नाका गत बुधबारबाट बन्द गरेका थिए ।
यता, नेपाली सुरक्षाकर्मीहरूले पनि भारतबाट आउने नेपालीलाई आउन दिए पनि भारतीय नागरिक र सवारी साधनको प्रवेशमा रोक लगाएका थिए ।
यसअघि प्रदर्शनकारीहरूले जमुनाहाको प्रहरी चेकपोस्टसहित भन्सार यात्रु शाखामा मङ्गलबार दिउँसो आगजनी र तोडफोड गरेर ध्वस्त बनाएका थिए ।
-original-thumb.jpg)