पेशावर, पाकिस्तान, भदौ २८ गते । पाकिस्तानको उत्तरपश्चिमी क्षेत्रमा रहेको दक्षिण वजिरिस्तान जिल्लामा शनिबार बिहान करिब ४ बजे पाकिस्तानी तालिबान समूहद्वारा गरिएको आक्रमणमा कम्तीमा १२ सुरक्षाकर्मीको ज्यान गएको छ ।
स्थानीय सरकारी अधिकारीका अनुसार सैनिकको एक गस्ती दल गुडिरहेको बेलामा दुवैपट्टिबाट भारी हतियारसहित आक्रमण गरिएको थियो । आक्रमणमा १२ सुरक्षाकर्मी मारिएका र अन्य ४ घाइते भएका छन् । घटनास्थलमा तैनाथ अर्का एक सुरक्षाकर्मीले पनि मृत्युको सङ्ख्या पुष्टि गरेका छन् र आक्रमणकारीले सुरक्षाकर्मीको हतियार पनि कब्जामा लिएको जानकारी दिनुभएका छन् ।
पाकिस्तानी तालिवान, जसलाई तहरीक-ए-तालिवान पाकिस्तान भनिन्छ, यो समूह अफगान तालिवानबाट पृथक भए पनि घनिष्ठ सम्बन्ध रहेको मानिन्छ । उक्त आक्रमणको जिम्मेवारी सोही समूहले सामाजिक सञ्जालमार्फत लिएको छ । यो आक्रमण पछिल्ला महिनामा खैबर पख्तुनख्वा प्रान्तमा भएको सबैभन्दा घातक घटना मध्ये एक हो ।
सो क्षेत्र केही वर्षअघिसम्म तहरीक-ए-तालिवानको प्रभावमा थियो, जसलाई सन् २०१४ देखि सुरु भएको सैनिक कारबाहीपछि धकेलिएको थियो । पाकिस्तानी सरकारले अफगानिस्तानमाथि आतङ्ककारीलाई आफ्नो भूमिबाट पाकिस्तानमाथि आक्रमण गर्न दिएको आरोप लगाउँदै आएको छ, जुन आरोपलाई काबुलस्थित अफगान सरकारले अस्वीकार गर्दै आएको छ ।
खैबर पख्तुनख्वा प्रान्तका विभिन्न जिल्लामा स्थानीयहरूले तहरीक-ए-तालिवानको नाम लेखिएको पर्खाल लेखोट देखिएको बताएका छन् । उनीहरू पुनः सोही समूहको त्रासद शासन फर्कने डर व्यक्त गर्छन्, जुन अमेरिकी ’आतङ्कविरुद्धको युद्ध’ को समयमा अफगानिस्तानबाट फैलिएको थियो ।
एक वरिष्ठ स्थानीय अधिकारीका अनुसार पछिल्लो समय तहरीक-ए-तालिवानका लडाकूको सङ्ख्या र आक्रमणको सङ्ख्या दुबै बढेको छ । सन् २०२५ को जनवरी १ देखि हालसम्म करिब ४६० जनाको ज्यान गइसकेको छ, जसमा धेरैजसो सुरक्षाकर्मी रहेका छन् । यी आक्रमण खैबर पख्तुनख्वा र बलुचिस्तान प्रान्तमा भएका हुन् ।
सन् २०२४ पाकिस्तानका लागि झन्डै एक दशक यताकै सबैभन्दा रक्तपातपूर्ण वर्ष बनेको थियो, जसमा एक हजार ६०० भन्दा बढी मानिसको मृत्यु भएको थियो । तीमध्ये करिब आधा सुरक्षाकर्मी र प्रहरी थिए । जसको विवरण इस्लामाबादस्थित अनुसन्धान संस्था ‘सुरक्षा अध्ययन तथा अनुसन्धान केन्द्र’ले दिएको हो । रासस/एएफपी
