शिवशंकर मिश्रा
बारा, भदौ १५ गते । बाराको सिम्रौनगढ नगरपालिका –५, कोनिहाटी चौरमा आइतबार साँझ करेन्ट लागेर एक महिलाको ज्यान गएको छ। आज करिब ३ः३० बजे घाँस काट्ने क्रममा करेन्ट लागेर शम्भुप्रसाद यादवकी ५० वर्षीया श्रीमती अनितादेवी यादवको घटनास्थलमै मृत्यु भएको हो।
भनु महतोले आफ्नो खेतमा पानी हाल्नका लागि जडान गरेको विद्युतीय मोटरको खुला तार अनितादेवीले हसियाले काट्दा अचानक करेन्ट लागेको स्थानीयले बताएका छन् । घटनाको जानकारी पाउनेबित्तिकै इलाका प्रहरी कार्यालय सिम्रौनगढबाट प्रहरी निरीक्षक पवन पछाईको कमाण्डमा अनुसन्धान टोली खटिएको थियो ।
आवश्यक अनुसन्धान कार्य अगाडि बढाइएको जिल्ला प्रहरी कार्यालय बाराका प्रहरी नायब उपरीक्षक (डिएसपी) बिजयराज पण्डितले बताउनुभयो। विद्युत सुरक्षामा लापरवाहीका कारण ज्यान गएको हुनसक्ने आशंका गरिएको छ। घटनासम्बन्धी थप अनुसन्धान जारी रहेको उहाँले जानकारी दिनुभयो।
