गोरखापत्र समाचारदाता
काठमाडौँ, भदौ १५ गते । उपत्यकाव्यापी माध्यमिक विद्यालय स्तरीय लघुकथा प्रतियोगिताका विजेतालाई पुरस्कार प्रदान गरिएको छ । हाम्रो लघुकथा केन्द्र, दक्षिणकालीद्वारा राजधानीमा आयोजित कार्यक्रममा उपत्यकाव्यापी माध्यमिक विद्यालय स्तरीय लघुकथा प्रतियोगिताको नतिजा सार्वजनिक गरी पुरस्कार प्रदान गरिएको हो ।
प्रतियोगितामा ग्रिनहिल विद्यालय फर्पिङका विद्यार्थी समिपजङ्ग केसी प्रथम, बालविकास बोर्डिङ स्कुल बुढानिलकण्ठका सुमन भन्डारी द्वितीय, महेन्द्रग्राम मावि चाँगुनारायणका दुर्गा परियारले तृतीय पुरस्कार प्राप्त गर्नुभयो । त्यसैगरी सान्त्वना पुरस्कार ट्रिनिटी माविका स्नेहा अधिकारीले जित्नुभयो ।
केन्द्रका कार्यवाहक अध्यक्ष डा. शेखरकुमार श्रेष्ठले लघुकथा प्रतियोगिताका विजेता विद्यार्थीलाई क्रमशः ७ हजार रुपियाँ, पाँच हजार रुपियाँ, तीन हजार रुपियाँ र सान्त्वना पुरस्कार दुई हजार रुपियाँ नगद पुरस्कार, प्रमाणपत्रसहित पुस्तक प्रदान गरिएको बताउनुभयो ।
उक्त प्रतियोगितामा साहित्यकार नवराज रिजालको संयोजनमा रामकुमार पण्डित र तारा केसीको निर्णायक मण्डल समिति गठन गरिएको थियो । नेपाल स्रष्टा समाजका अध्यक्ष श्रीओम श्रेष्ठ “रोदन” ले यस्ता प्रतियोगितात्मक कार्यक्रमहरूले विद्यार्थीहरूमा साहित्यिक जागरणका लागि प्रेरित गर्ने अवसर मिल्ने बताउनुभयो ।
केन्द्रकी कोषाध्यक्ष सत्या अधिकारीले बालबालिकालाई साहित्यमा रुचि जगाउने अवसरका रूपमा केन्द्रले प्रतियोगिताको आयोजना गरेको बताउनुभयो । लघुकथा समाजका अध्यक्ष तुलसीहरि कोइरालाले औपचारिक शिक्षासँगै बालबालिकालाई सिर्जना गर्न र साहित्यका पुस्तकहरू पढ्ने बानी बसाल्न आवश्यक रहेको बताउनुभयो ।
त्यसैगरी ललितपुर माविका विद्यालय निर्देशक उत्तमराज त्रिपाठीले साहित्यिक सङ्घ संस्थाले बालबालिकालाई पनि प्रेरणा दिने यस्ता कार्यक्रमको आयोजना गरेर साहित्यमा पुस्तान्तरणको अभ्यास बढाउनुपर्नेमा जोड दिनुभयो । उपत्यकाका विभिन्न स्कुलका ३१ जना विद्यार्थीले प्रतियोगितामा सहभागी हुनुभएको थियो ।
