काठमाडौँ, भदौ १५ गते । सरकारले बाढीपहिरोका कारण अवरुद्ध आठ सडक तत्काल खुलाउने भएको छ ।
कार्यवाहक प्रधानमन्त्री एवम् सहरी विकासमन्त्री प्रकाशमान सिंहले बाढी पहिरोका कारण अवरुद्ध बनेका सडक खुलाएर तत्काल आवतजावत सहज बनाउन निर्देशन दिनुभएको हो ।
आइतबार सहरी विकास मन्त्रालयमा कार्यवाहक प्रधानमन्त्री सिंहको अध्यक्षतामा बसेको बैठकमा उहाँले सडक अवरुद्ध हुँदा नागरिकलाई समस्या हुने भन्दै तत्कालै समस्या आएका ठाउँमा समाधान गर्नेगरी काम गर्नुपर्ने बताउनुभयो ।
बैठकमा गृहमन्त्रालय अन्तर्गतको विपद् पूर्वतयारी प्रतिकार्य शाखाले वर्षाका कारण अवरुद्ध हुन पुगेका सडकबारे तयार गरेको विवरण कार्यवाहक प्रधानमन्त्री सिंहलाई जानकारी गराइएको थियो ।
हाल पासाङ ल्हामु राजमार्ग अन्तर्गत रसुवा गोसाइकुण्ड गाउँपालिका–२, टिमुरे, अरनीको राजमार्गअन्तर्गत भोटेकोशी गाउँपालिका–२, कोदारी र घट्टेखोला, बेनिजोमसोम सडक खण्ड अन्तर्गत रघुगङ्गा गाउँपालिका दुई खोलीमा सडक अवरुद्ध छ ।
त्यस्तै, घोराही थवाङ शहीद मार्गअन्तर्गत त्रिवेणी गाउँपालिका, भेरि काेरिडोरअन्तर्गत त्रिपुरासुन्दरी नगरपालिका छलघाट, कर्णाली राजमार्गअन्तर्गत शुभकालीन गाउँपालिका र भेरी काेरिडोर अन्तर्गत आठबिसकोट नगरपालिकामा सडक अवरुद्ध छ ।
त्यस्तै, कार्यवाहक प्रधानमन्त्री सिंहले विपद्सम्बन्धि पूर्व सतर्कताका लागि यसअघि म्यासेज पठाउने गरिएकोमा अबदेखि भ्वाइस कल पनि गर्ने व्यवस्थाका लागि आवश्यक व्यवस्था मिलाउन निर्देशन दिनुभयो ।
