लक्ष्मी तिमिल्सेना
जमुनाह, भदौ १५ गते । सुशासन, पारदर्शिता र सेवा प्रवाहलाई प्रभावकारी बनाउन लक्षित शासकीय संवाद श्रृङ्खला आइतबार नेपालगन्जमा सम्पन्न भएको छ । शासकीय संवाद श्रृङ्खलामा निजामती सेवामा योग्यता, क्षमता र जवाफदेहिता सुनिश्चित गर्दै नागरिकमैत्री सेवा प्रवाह गर्नुपर्नेमा पनि जोड दिइएको थियो ।
त्यस्तै विश्वसनीय बजेट, प्रभावकारी सार्वजनिक खरिद र सार्वजनिक वित्तीय व्यवस्थामा सुधारका लागि संस्थागत कदम चाल्नुपर्नेमा नेपालगन्ज उप–महानगरपालिकाका प्रमुख प्रशासकिय अधिकृत रामहरि शर्माले जोड दिनुभयो । यसैगरी महिला कर्मचारीको कामको मूल्याङ्कन नभएको कर्मचारीहरूको गुनासो थियो ।
भ्रष्टाचार नियन्त्रण, पारदर्शिता र जवाफदेहितालाई प्रोत्साहन गर्न सत्यनिष्ठा प्रणाली सुदृढ गर्ने सवालमा समेत छलफल गरिएको थियो । संवादका क्रममा नागरिक समाजका अगुवा प्रभात ठकुरीले विभिन्न तहका सरकारबिच सहकार्य मार्फत सुशासनलाई सवलीकरण गर्नुपर्ने विचार व्यक्त गर्नुभयो ।
डिजिटल सुशासनलाई सेवा प्रवाहमा जोड दिने क्रममा देखिएका समस्या र समाधानबारे बहस गर्दै, सूचना प्रविधिको प्रभावकारी प्रयोगले मात्र नागरिकमैत्री शासन सम्भव हुने कुरामा सहभागीले जोड दिएका थिए ।
सार्वजनिक सेवामा देखिने गरी सुधार ल्याउने र नागरिकबिच विश्वास कायम गर्न गरिएका राम्रा अभ्यास र सफल पहलहरूको अनुभवसमेत सहभागीले साझा गरेका थिए । यद्यपी पूर्व अध्ययन नगरिकन ल्याइने योजनाका कारण सरकार र जनता दुवैले दुःख पाएको पत्रकार महासङ्घका अध्यक्ष नविन गिरीको भनाइ थियो । साथै उहाँले बेला–बेलामा कर्मचारीहरूमा शासकिय दम्भ देखिएको जस्तो भान हुने गरेको बताउनुभयो ।
प्रमुख जिल्ला अधिकारी धर्मराज जोशीले महिला, सीमान्तकृत समूह र भौगोलिक रूपमा विकट क्षेत्रमा रहेका जनताका लागि समावेशी शासन सुनिश्चित गर्ने आवश्यकतामा जोड दिइयो । साथै, विपद् र जलवायु सुशासनलाई मजबुत बनाउन नीति र कार्यान्वयन दुबै स्तरमा सुधार गर्नुपर्ने बताउनुभयो ।
संवादका क्रममा प्रस्तुत सुझाव र धारणा आगामी नीति निर्माण तथा कार्यान्वयनमा उपयोगी हुने प्रधानमन्त्री तथा मन्त्री परिषदको कार्यालयका सह–सचिव भीष्मकुमार भुषालले विश्वास व्यक्त गर्नुभयो।
प्रधानमन्त्री तथा मन्त्रिपरिषद्को कार्यालयको आयोजना तथा जिल्ला प्रशासन कार्यालय बाँकेको सहजीकरणमा सम्पन्न कार्यक्रममा सरकारी कार्यालयका कर्मचारी, कार्यालय प्रमुख, नागरिक समाजका अगुवा, व्यवसायी, जनप्रतिनिधि र सञ्चारकर्मीहरूको उल्लेखनीय उपस्थिति रहेको थियो ।
