काठमाडौँ, भदौ १५ गते । राष्ट्रिय व्यावसायिक पहल (एनबिआई) को १९औँ वार्षिक साधारण सभाले नयाँ कार्यसमिति निर्विरोध निर्वाचित गरेको छ ।
सभाले अध्यक्षमा पुनः कुशकुमार जोशीलाई सर्वसम्मतरूपमा चयन गरेको हो । उपाध्यक्षमा शकुन्तलाल हिराचन, महासचिवमा सुरेन्द्रवीर मालाकार, कोषाध्यक्षमा सरोज प्रसाद पाण्डे, सचिवद्वयमा सुरेश प्रधान र डा. बविन पोखरेल तथा सह–कोषाध्यक्षमा राजेश खड्का निर्वाचित हुनुभएको छ ।
त्यसैगरी, सदस्यमा शिवप्रसाद घिमिरे, रमेश शर्मा, रविन्द्रमान सिंह प्रधान, लता प्याकुरेल, अरनिको राजभण्डारी, खेम लकाई, सरिता महर्जन निर्वाचित हुनुभएको छ ।
संस्थागत तर्फबाट नेपाल हस्तकला महासङ्घका राजमान बज्राचार्य र नेपाल वैदेशिक रोजगार व्यवसायी सङ्घका महेशकुमार बस्नेत कार्यसमिति सदस्य बन्नु भएको छ । सभाले राजेशबाबु श्रेष्ठ, ध्रुवकुमार श्रेष्ठ, डा. राजेन्द्रकुमार घिसिङ, होमनाथ उपाध्याय तथा सनम शाक्यलाई सदस्यका रूपमा मनोनीत गरेको छ ।
नवनिर्वाचित अध्यक्ष जोशीले सम्पूर्ण पदाधिकारीलाई बधाई ज्ञापन गर्दै नयाँ कार्यसमिति दूरगामी महत्त्वका निर्णयलाई कार्यान्वयन गर्न प्रतिबद्ध रहने बताउनुभयो ।
उहाँले अनुभवी व्यक्तित्वको प्रतिनिधित्व भएकाले संस्थाले आगामी दिनमा अझ प्रभावकारी भूमिका निर्वाह गर्ने विश्वास व्यक्त गर्नुभयो ।
महासचिव सुरेन्द्रवीर मालाकारले साधारण सभामा वार्षिक प्रगति प्रतिवेदन प्रस्तुत गर्नुभयो । प्रतिवेदनमा संस्थागत सामाजिक उत्तरदायित्वसम्बन्धी अवधारणा पत्र तयारी, मानव अधिकार आयोगसँगको छलफल, युएसएआइडी तथा युएनडिपीसँग सहकार्यमा भएका गतिविधि, आचारसंहिताको अनुगमन लगायतका विषय समेटिएका थिए । आर्थिक प्रतिवेदन सर्वसम्मतिले पारित भएको थियो ।
साधारण सभामा पूर्वमन्त्री एवं सल्लाहकार उमेश श्रेष्ठले आर्थिक अवस्था सन्तोषजनक नरहेको र निजी क्षेत्रमा आत्मविश्वास सिर्जना हुन नसकेको भन्दै ठुला परियोजना सञ्चालन आवश्यक रहेको सुझाव दिनुभयो ।
संस्थापक अध्यक्ष पद्म ज्योतिले नेपाल विकासोन्मुख मुलुकको श्रेणीमा स्तरोन्नति हुँदै गरेको सन्दर्भमा व्यवसायीले अवसर र चुनौती दुवैलाई सामना गर्नुपर्नेमा जोड दिनुभयो ।
सामाजिक–आर्थिक विकासमार्फत दिगो शान्ति स्थापनाको उद्देश्यले करिब दुई दशकअघि स्थापना भएको राष्ट्रिय व्यावसायिक पहलले संस्थागत सामाजिक उत्तरदायित्व, दिगो विकास, स्वच्छ व्यवसाय प्रवर्धन, व्यवसाय–मानव अधिकार, विपत् व्यवस्थापन र औद्योगिक वातावरण निर्माणमा नीतिगत पैरवी गर्दै आएको छ ।
