द हेग, साउन २० गते । अमेरिकी भण्डारहरूबाट डेलिभरी छिटो बनाउने नयाँ योजना अन्तर्गत पूर्ण प्याकेज फन्ड गर्ने पहिलो नाटो सदस्य बन्दै नेदरल्यान्ड्सले युक्रेनका लागि ५० करोड युरो (५७ करोड ७० लाख डलर) को अमेरिकी हतियारहरू खरिद गर्ने रक्षा मन्त्रालयले बताएको छ ।
यो खरिद गत महिना अमेरिकी राष्ट्रपति डोनाल्ड ट्रम्प र नाटो महासचिव मार्क रुटले सुरु गरेको प्राथमिकता युक्रेन आवश्यकता सूची (पियुआरएल) संयन्त्र अन्तर्गत हुने छ । यो योजना अन्तर्गत, देशहरूले अमेरिकी गोदामहरूमा रक्षा प्रणाली र हतियारहरूका लागि वासिङ्टनलाई भुक्तानी गर्ने छन् जुन त्यसपछि युक्रेनमा पठाइन्छ । सन् २०२२ फेब्रुअरीदेखि युक्रेन रूसी आक्रमणसँग लडिरहेको छ ।
“नेदरल्यान्ड्सले अब अमेरिकी भण्डारबाट सैन्य उपकरण आपूर्ति गर्न नेतृत्व लिइरहेको छ”, डच रक्षामन्त्री रुबेन ब्रेकलमन्सले एक्समा भन्नुभयो, “दृढ सङ्कल्पका साथ युक्रेनलाई समर्थन गरेर हामी रूसमाथि वार्ता गर्न दबाब बढाइरहेका छौँ ।” युक्रेनका राष्ट्रपति भोलोदिमर जेलेन्स्कीले सोमबार साँझ नेदरल्यान्ड्सका प्रधानमन्त्री डिक स्कुफलाई फोन गरेर धन्यवाद दिनुभएको छ ।
“यी हतियारहरूको अत्यन्तै आवश्यकता छ”, रुसले गरेको लगभग दैनिक ड्रोन र मिसाइल आक्रमणहरूमाथि प्रकाश पार्दै स्कुफले एक्समा पोस्ट गर्नुभयो । रक्षा मन्त्रालयका अनुसार डच प्याकेजमा अमेरिकी प्याट्रियट मिसाइलका पार्टपुर्जाहरू र युक्रेनको अग्रपङ्क्तिको आवश्यकताहरू अनुकुल अन्य प्रणालीहरू समावेश छन् ।
ब्रेकलमन्सले रुसी हवाई आक्रमणलाई ‘विशुद्ध आतङ्क’ भन्नुभएको छ र युक्रेनी क्षेत्रमा मस्कोको प्रवेशले युरोपका लागि व्यापक खतरा निम्त्याउन सक्ने चेतावनी दिनुभएको छ । “रुसले युक्रेनमा जति प्रभुत्व जमाउँछ, नेदरल्यान्ड्स र हाम्रा नाटो सहयोगीहरूका लागि त्यति नै ठुलो खतरा हुन्छ”, उहाँले भन्नुभयो ।
वासिङ्टनले युक्रेनका लागि पियुआरएल संयन्त्रअन्तर्गत ५० करोड डलरको सैन्य सहयोग जारी गरिरहेको छ । अन्य सहयोगीहरूले यो पहलमा सामेल हुने वाचा गरे पनि नेदरल्यान्ड्स रकम स्थानान्तरण गर्ने पहिलो देश हो । यसले पहिले नै युक्रेनमा एफ-१६ प्रशिक्षण र डेलिभरीका लागि ट्याङ्क, ड्रोन, गोला बारुद र सहयोगको प्रतिज्ञा गरिसकेको छ ।
नाटोका महासचिव मार्क रुटले यस कदमको स्वागत गर्दै यसलाई नयाँ ढाँचाअन्तर्गत महत्त्वपूर्ण पहिलो कदम भन्नुभएको छ । “नेदरल्यान्ड्सले नेतृत्व लिइरहेको र युक्रेनका लागि अमेरिकी सैन्य उपकरणको पहिलो प्याकेजलाई आर्थिक सहयोग गरेको देखेर राम्रो लाग्यो”, उहाँले एक्समा भन्नुभयो, “रुसी आक्रमणबाट रक्षा गर्न युक्रेनलाई तत्काल आवश्यक पर्ने उपकरणहरू प्राप्त गराउनुभएकामा म मित्र राष्ट्रहरूलाई धन्यवाद दिन्छु ।” रासस/एएफपी
