काठमाडौँ, असार १९ गते । किक बक्सिङ खेलको इतिहासमा नयाँ कीर्तिमान कायम गर्न सफल नेपाली युवा बक्सर अविरल घिमिरेले आगामी भदौ २० गते जापानको टोकियो सहरमा आयोजना हुने ‘के वान विश्व म्याक्स टुर्नामेन्टमा भिड्ने हुनुभएको छ ।
विश्वप्रसिद्ध क्लब के वान ग्रुपद्वारा आयोजना हुने सो प्रतियोगितामा ‘हिमालयन चितुवा’को नामले विश्व परिचित बक्सर घिमिरेसहित चीन, बुलगेरिया, नेदरल्यान्ड, ब्राजिल, पोल्यान्ड र आरमेनियाका चर्चित बक्सर रिङमा उत्रन लाग्नुभएको हो ।
विश्व प्रसिद्ध ‘के वान विश्व म्याक्स टुर्नामेन्ट’मा भाग लिनका लागि बक्सर घिमिरे विशेष प्रशिक्षणका लागि जापानबाट आज थाइल्यान्डको फुकेट सहरको मोथाई क्लबतर्फ प्रस्थान गर्नुभएको छ । उहाँले आफ्नै खर्चमा प्रशिक्षण लिनुहुने जनाइएको छ ।
गत जेठमा जापानको ओसाका सहरमा सम्पन्न ‘के वन क्रस १७५’को उपाधि चुम्दै बक्सर घिमिरेले पहिलो पटक तीन वटा अन्तर्राष्ट्रिय ‘किक बक्सिङ उपाधि’ हात पारेर अदम्य साहस तथा असाधारण उपलब्धि हाँसिल गर्नुभएको थियो ।
अत्यन्त प्रतिस्पर्धात्मक प्रतियोगितामा उहाँले जापानी किक बक्सिङ ‘च्याम्पियन’ ओडा जिन्कलाई दोस्रो राउन्डमा परास्त गर्दै विश्व ‘च्याम्पियन’ बन्नुभएको हो ।
‘च्याम्पियन’ जिन्कलाई रिङ्मा ढाल्ने बक्सर घिमिरे पहिलो नेपाली खेलाडी बन्नुभएको बक्सर अविरलका पिता एवं पूर्वअन्तराष्ट्रिय किक बक्सर तथा फुलकन्ट्र्याक कराँते खेलाडी देव घिमिरेले जानकारी दिनुभयो ।
उहाँका अनुसार ‘के वन क्रस १७५’ लाई किक बक्सिङ खेलका क्षेत्रमा अन्त्यन्त प्रतिष्ठित प्रतियोगिता मानिन्छ । ‘इन्टरनेसनल किक बक्सिङ’ ‘इस्का’ र ‘हिट’ प्रतियोगिताको टाइटल बेल्ट जित्ने बक्सर घिमिरे पहिलो नेपाली खेलाडी हुनुहुन्छ ।
बक्सर अविरल आफ्ना पिता बक्सर देवको साथमा जापानको नागोया सहरमा बस्दै आउनुभएको छ । कराँते खेलाडी देव सन् २००४ मा कोरियाको सोलमा सम्पन्न ‘के वान प्राफेसलन किक बक्सिङ प्रतियोगिता’मा सहभागी हुने पहिलो दक्षिण एसियाली खेलाडी हुनुहुन्छ ।
चन्द्रागिरि नगरपालिका–१२, गुर्जुधारा बलम्बूका बासिन्दा उहाँको परिवार हाल जापानको नागोया सहरमा बसोवास गर्दै आइरहेको छ ।
