तिलाचन पाण्डे
तम्घास, वैशाख १५ गते । गुल्मीमा डेढ करोडभन्दा बढी लगानीको हाटबजार अहिले सवारी पार्किङ र विद्युतका पोल राख्नेमा प्रयोग भएको छ । सदरमुकाम तम्घासस्थित चारीखोलामा रेसुङगा नगरपालिकाले सञ्चालनमा ल्याएको हाटबजार सवारी साधन र विद्युतका पोल राख्ने कार्यमा प्रयोग भएको हो ।
साविकको जिल्ला विकास समिति, कृषि कार्यालय र पशुसेवा कार्यालयका साथै नगरपालिकाको गरी कुल डेढ करोडभन्दा बढी लगानी रहेको हाटबजार उद्देश्य अनुसार प्रयोग नभइ गाडी पार्किङको रूपमा परिणत भएको छ । उक्त स्थानमा केही वर्ष पहिले कृषकले उत्पादन गरेका कृषि उपजहरूलाई नगरपालिकाले नै खरिद गरी बिक्री गर्ने गरेको थियो । पछि व्यक्तिलाई हाटबजार सञ्चालनको जिम्मा दिएपनि धेरै समय टिक्न सकेन र अहिले सवारी साधन पार्किङको रूपमा हाटबजार रहेको छ ।
निजी क्षेत्रले हाटबजारलाई सञ्चालन गर्न नसकेकाले हाटबजारलाई नगरले व्यवस्थित गर्न लागेको नगर प्रमुख खिलध्वज पन्थीले बताउनुभयो । विगत केही महिनादेखि हाटबजार सञ्चालनमा नआएको बताउँदै उक्त स्थानमा सुविधा सम्पन्न दुई तले भवन निर्माण गर्न लागेकाले भवन निर्माण पश्चात व्यवस्थित गरी नगरले हाटबजार सञ्चालनमा ल्याउने पन्थीले दाबी गर्नुभयो ।
यसै आर्थिक वर्षभित्रमा भवन सम्पन्न हुने भएकाले त्यस पश्चात नवनिर्मित भवनमा नयाँ व्यवस्थापनका साथ हाटबजार सञ्चालनमा ल्याएरै छाडने उहाँको भनाइ छ ।
जिल्ला समन्वय समिति गुल्मीको नाममा रहेको उक्त जग्गा ११ वर्षका लागि नगरपालिकाले भोगचलन गर्न पाउने गरी जिल्ला समन्वय समिति र नगरबिच सम्झौता भएको हो । आपसी समझदारीमा अवधि थप गर्न सक्नेसमेत सम्झौता पत्रमा उल्लेख गरिएको छ ।
प्रत्येक आर्थिक वर्ष सम्पन्न भएको तीन महिना भित्र हाटबजारको आयव्याय विवरण जिल्ला समन्वयलाई बुझाउनुपर्ने छ । प्रतिवेदनका आधारमा नाफा भए नाफाको २५ प्रतिशत नगरपालिकाले समन्वयलाई बुझाउन पर्ने सम्झौतामा उल्लेख गरिएको छ ।
