अस्मिता पोखरेल
धादिङबेँसी, चैत २३ गते । तीन खण्डमा सडक विस्तारको काम भइरहेको मुग्लिङ–नागढुङ्गा सडकको एउटा खण्डको काम सत्तरी प्रतिशत सकिएको छ ।
नागढुङ्गादेखि नौबिसेसम्म १२.२६ किलोमिटर सडकको काम अहिले ७० प्रतिशत सकिएको हो । यातायातको अत्यधिक चाप हुने यो सडकखण्डमा नालीसहित कालोपत्रे गर्ने काम पनि एकैसाथ हुँदै आएको छ । यो सडकखण्डको १२.२६ किलोमिटरमध्ये साढे ११ किलोमिटर ड्रेन निर्माण सकिएर कालोपत्रे गर्ने कार्य अन्तिम चरणमा पुगेको नागढुङ्गा–मुग्लिङ सडक पूर्वीखण्डका योजना प्रमुख केशव ओझाले जानकारी दिनुभयो ।
स्तरोन्नतिको काम सुरु भएको दुई वर्ष १० महिनामा यो कार्यप्रगति देखिएको हो । सवारीसाधनको अत्यधिक चाप र साइड क्लियर पार्न कठिनाइ भएका कारण काममा केही ढिलाइ भएको कार्यालय प्रमुख ओझाले बताउनुभयो । उहाँले भन्नुभयो, “अहिले कामले गति लिएको छ । फराकिलो पारेर कालोपत्रे गरेपछि सवारीसाधनको जाम हुने समस्या केही हदमा हटेको छ ।
उहाँका अनुसार नौबिसेबाट खत्रीपौवाको पुल हुँदै सुरुङमार्गसम्मको सडक कालोपत्रे गर्ने काम चाँडै सकिने छ । बाँकी भागलाई यसै आर्थिक वर्षभित्र नागढुङ्गासम्म कालोपत्रे गर्ने लक्ष्य पनि राखिएको छ । खत्रीपौवा र नौबिसेमा दुई वटा पुल
निर्माणाधीन अवस्थामा छन् । खत्रीपौवाको पुल निर्माण अन्तिम चरणमा छ । असार मसान्तसम्म सम्पन्न गर्ने लक्ष्यसहित नौबिसेको पुलमा काम भइरहेको छ ।”
त्रिभुवन राजपथको नागढुङ्गादेखि पृथ्वी राजमार्गको मुग्लिङसम्म तीन वटा प्याकेजमा छुट्टाछुट्टै ठेक्कामार्फत सडक स्तरोन्नतिको काम सुरु गरेको हो । पहिलो प्याकेजमा नागढुङ्गा–नौबिसे, दोस्रोमा नौबिसे–मलेखु र तेस्रोमा मलेखु–मुग्लिङ भनी छुट्याइएको छ । पहिलो प्याकेज अन्तर्गत नागढुङ्गा–नौबिसे १२.२६ किलोमिटर, दोस्रो ४३.५४ किलोमिटर र तेस्रो ३८.८६ किलोमिटर छ ।
नागढुङ्गा–नौबिसे खण्डको कामले पछिल्लो समय गति लिए पनि नौबिसे–मलेखु खण्डको काम भने सुस्त देखिएको छ । नौबिसे–मलेखु सडकखण्डको निर्माण कार्य अपेक्षित गतिमा अघि बढ्न नसकेको योजना प्रमुख ओझाले बताउनुभयो । यो खण्डमा हालसम्म ३२ प्रतिशत काम भएकोे छ ।
४३.५४ किलोमिटरमध्ये ३० किलोमिटर सडक कटिङ गर्ने काम सकिएको छ भने बाँकी १३ किलोमिटर अप्ठ्यारो तथा विवादित क्षेत्र रहेकाले कार्य अघि बढ्न ढिलाइ भएको उहाँले जानकारी दिनुभयो । निर्माण कार्यमा विभिन्न समस्या देखिएका छन् । योजना प्रमुख ओझा भन्नुहुन्छ, “निर्माण सामग्रीको नियमित आपूर्ति नहुँदा काममा ढिलाइ भएको छ । बाढीपहिरो, विद्युत् पोल स्थानान्तरण, रुख कटान तथा स्थानीय विवादका कारण पनि निर्माण कार्य प्रभावित भइरहेको छ ।”
नौबिसे–मलेखुखण्डको हालसम्म सात किलोमिटर सडक कालोपत्रे सम्पन्न भइसकेको र १६ किलोमिटर सडक यसै वर्ष कालोपत्रे गर्ने लक्ष्य लिइएको छ । बाँकी नौ किलोमिटरमा कुनै समस्या नआए यो आर्थिक वर्षभित्रै निर्माण सम्पन्न गर्ने लक्ष्य राखिएको छ । आयोजनाका अनुसार बाँकी खण्ड अर्को वर्ष सम्पन्न गरिने छ ।
मलेखु–नागढुङ्गा खण्डमा १३ वटा पुल निर्माण गरिँदै छ । त्यसमध्ये तीन वटा पुलमा गाडी सञ्चालन भइसकेको छ भने चार वटा पुल आपत्कालीन अवस्थाका लागि तयार छन् । बाँकी तीन वटा पुल असारसम्म सम्पन्न हुने अपेक्षा गरिएको छ तर अन्तिम तीन वटा पुलको काम मङ्सिर–पुससम्म मात्र सकिने अनुमान गरिएको छ ।
नागढुङ्गा–नौबिसे सडकखण्ड साउन १० गतेसम्म सम्पन्न गरिसक्नुपर्ने छ भने नौबिसे–मलेखु खण्ड जेठभित्र सम्पन्न गर्ने लक्ष्य राखिएको छ तर प्राविधिक तथा भौगोलिक कठिनाइका कारण केही समय थप लाग्न सक्ने ओझाले बताउनुभयो ।
