फालिएका बोतलबाट रिसोर्ट

अनिल पराजुली

हेटौँडा, चैत २२ गते । घर, पर्खाल तथा सिँढीलगायतका संरचना निर्माण गर्दा सामान्यतः ढुङ्गा, इँटा, ब्लक प्रयोग गर्ने गरिन्छ तर खेर गएका र फालिएका पेय पदार्थको सिसाको बोतल प्रयोग गरेर मकवानपुरमा रिसोर्ट निर्माण गरिएको छ । 

पर्यटकीय गन्तव्य मकवानपुरको थाहा नगरपालिका–९, चित्लाङमा सिसाको बोतल प्रयोग गरेर रिसोर्ट निर्माण गरिएको हो । ४४ वर्षीय देवेन्द्र नेपालले पर्यटकलाई लोभ्याउन नौलो अभ्यास गर्नुभएको छ । उहाँले खेर गएका र फ्याँकिएको पेय पदार्थको बोतल प्रयोग गरेर रिसोर्ट नै निर्माण गर्नुभएको हो । 

काठमाडौँको टौदहमा सिसाको बोतलले बनेको घर देखेपछि तीन वर्षअघि उहाँको मनमा चित्लाङमा पनि पर्यटकलाई आकर्षित गर्न बोतलको प्रयोग गरेर कटेज निर्माण गर्ने योजना बनेपछि काम थाल्नुभएको हो । १० वर्षअघि चित्लाङ रिसोर्ट सञ्चालन गर्दाको समयदेखि जम्मा भएको बोतल प्रयोग गरेर उहाँले नयाँ स्थानमा एक/एक वटा कटेज गर्दै रिसोर्ट नै निर्माण गरेको जानकारी दिनुभयो । 

डेढ लाख सिसाका बोतल प्रयोग गरेर नेपालले चित्लाङ अर्गानिक भिलेज रिसोर्ट निर्माण गरी सञ्चालन गर्नुभएको हो । २० रोपनी क्षेत्रफलमा २५ वटा कोठासहित उहाँले सञ्चालन गर्नुभएको रिसोर्ट सिसाका बोतलले निर्माण गरिएको हो । रिसोर्ट जाने बाटोको भर्‍याङ, रिसोर्टभित्र निर्माण गरिएको मूलस्तभ, पर्खाल र अन्य संरचना आकर्षक रूपमा सिसाको बोतल प्रयोग गरिएको छ । 

पर्यटन व्यवस्थापनमा स्नातकोत्तर गर्नुभएका नेपाल रोजगारीको सिलसिलामा दुबई पुग्नुभएको थियो । आफ्नै देशमा केही गर्ने सोच जागेपछि नेपाल फर्केर उहाँले चित्लाङमा पर्यटन व्यवसाय सुरु गर्नुभएको हो । स्थानीयस्तरमै पाइने उत्पादन यहाँ आउने आगन्तुकलाई खुवाउने गरिएको छ । 

चित्लाङमा पर्यटक व्यवसायको सुरुवात गर्नुभएको नेपालले चित्लाङ रिसोर्ट प्रालि पनि सञ्चालन गर्दै आउनुभएको छ । उहाँले सञ्चालन गरेको दुई वटै रिसोर्टमा करिब १५ करोड लगानी गर्नुभएको छ । यहाँबाट करिब ५० जनाले रोजगारी पाएका छन् । 

चित्लाङ आउने पर्यटकलाई चन्द्रागिरिबाट मकवानपुर झर्दा पहिलो धाराका रूपमा रहेको गुर्जुधारामा बसेर महाकवि लक्ष्मीप्रसाद देवकोटाले गीत लेखेको स्थान, चन्द्रशमशेरले बनाएको दरबार, सात धारा, सम्राट् अशोकले निर्माण गरेको अशोक चैत्य, मल्लकालीन बस्ती माझगाउँ, भैरव मन्दिर, अम्पुडोल, नुलगाउँ, सरकारी बाख्रा फार्म, भालेश्वर मन्दिरलगायतका पर्यटकीय क्षेत्रमा घुमाउने गरिएको छ । 

चन्द्रागिरि–थानकोट सडकखण्डको गणेशमान सिंह राजमार्गको करिब पाँच किलोमिटर सडक कच्ची भएका कारण यहाँ आउने पर्यटनमा कमी आएको पर्यटन व्यवसायी नेपालले गुनासो गर्नुभयो । सडक सञ्जाल राम्रो नहुँदा यहाँ आइपुग्ने पर्यटकले समस्या भोग्नु परेको उहाँको भनाइ छ । पूर्वाधार विकासको अभावमा पुराना सम्पदाको संरक्षण हुन नसकेको उहाँले बताउनुभयो । काठमाडौँबाट नजिकको दुरीमा रहेको चित्लाङमा यो नौलो अभ्यास हो । धार्मिक, ऐतिहासिक र पर्यटकीय स्थलमा विशेष गरेर काठमाडौँबाट विद्यार्थी अध्ययन, भ्रमणका लागि पनि पुग्ने गरेका छन् । 

यहाँ हेटौँडा, चितवन, काठमाडौँ र छिमेकी मुलुक भारतबाट पर्यटक आउने गरेका छन् । यहाँको सिसाका बोतलले बनेको रिसोर्ट, नासपाती बगैँचा पनि पर्यटकको रोजाइमा पर्दै आएको छ ।