गोरखापत्र समाचारदाता
काठमाडौँ, चैत २१ गते । प्रधानमन्त्री केपी शर्मा ओली नेतृत्वमा थाइल्यान्ड पुगेको नेपालको निजी क्षेत्रले सो औपचारिक भ्रमणलाई आपसी सम्बन्ध विस्तार, लगानी तथा ज्ञान आदानप्रदान तथा संस्थागत सहकार्यको अवसरका रूपमा उपयोग गरेको छ । बिम्स्टेकको छैटौँ बैठकमा सहभागी हुन थाइल्यान्डका प्रधानमन्त्री पेतोङत्रान सिनावात्राको निमन्त्रणामा प्रधानमन्त्री ओलीको नेतृत्वमा निजी क्षेत्रका नेतृत्वकर्तासहितको टोली बैङ्ककमा छ ।
बैङ्ककमा नेपालका निजी क्षेत्रका प्रतिनिधिमूलक संस्थाले दुवै देशका प्रधानमन्त्रीको उपस्थितिमा विभिन्न समझदारी तथा सम्झौता गरेका छन् । नेपाल उद्योग वाणिज्य महासङ्घले नेपाल र थाइल्यान्डबिच व्यापारिक सम्बन्ध सुदृढ गर्ने, आर्थिक सहकार्यलाई प्रवर्धन गर्ने तथा व्यापार र लगानी विस्तारका लागि संरचित रूपरेखा तयार गर्ने गरी थाई चेम्बर अफ कमर्स एन्ड बोर्ड अफ ट्रेडसँग समझदारीपत्रमा हस्ताक्षर गरेको छ ।
दुई देशबिचको व्यापारिक सहकार्यलाई थप मजबुत बनाउने र आर्थिक सहकार्यलाई विस्तार गर्ने गरी महासङ्घका अध्यक्ष चन्द्रप्रसाद ढकाल र थाई चेम्बर अफ कमर्स एन्ड बोर्ड अफ ट्रेडका अध्यक्ष सानन अङ्गुबोल्कुलले हस्ताक्षर गर्नुभएको हो ।
समझदारी अन्तर्गत दुवै पक्षले व्यापार प्रवर्धन, संयुक्त उद्यमको सुविधा, व्यापारिक जानकारी आदानप्रदान र औद्योगिक सहकार्यलाई समर्थन गर्ने प्रतिबद्धता व्यक्त गरेका छन् । “नेपाल र थाइल्यान्डबिच लगानी एवं व्यापार विस्तारको थप ढोका खुलेको छ,” अध्यक्ष ढकालले भन्नुभयो ।
बोर्ड अफ ट्रेडका अध्यक्ष सानन अङ्गुबोल्कुले थाई व्यवसायी नेपालका व्यवसायीसँग लगानी र व्यापार विस्तार गर्न इच्छुक रहेको बताउनुभयो । सोही कार्यक्रममा नै नेपाल उद्योग परिसङ्घ (सिएनआई) र थाई उद्योग महासङ्घ (एफटिआई) बिच दुई देशबिच लगानीका अवसर सिर्जना गर्दै नेपाल र थाइल्यान्डको आर्थिक तथा व्यावसायिक सम्बन्ध थप सुदृढ गर्न समझदारी भएको छ । परिसङ्घका अध्यक्ष राजेशकुमार अग्रवाल र एफटिआईका अध्यक्ष क्रियेङ्ग्राई थेननुकुलले समझदारीपत्रमा हस्ताक्षर गर्नुभयो ।
लगानी तथा व्यापार प्रवर्धनसँगै आर्थिक तथा व्यापारसम्बन्धी अध्ययन/अनुसन्धान, तालिम तथा क्षमता विकास, कानुनी, नीतिगत विषयमा जानकारी आदानप्रदानलगायतमा सहकार्य गर्ने दुई संस्थाबिच समझदारी भएको परिसङ्घका अध्यक्ष अग्रवालले बताउनुभयो । यो समझदारीले थाइल्याडको लगानी नेपाल भित्र्याउन सहयोग गर्ने विश्वास उहाँको छ ।
सो अवसरमा नेपाल चेम्बर अफ कमर्सले पनि टुरिजम काउन्सिल अफ थाइल्यान्डसँग व्यापार, पर्यटन र नागरिक उड्डयनको क्षेत्रमा सहकार्यको समझदारी गरेको छ । समझदारीपत्रमा नेपाल चेम्बर अफ कमर्सका अध्यक्ष कमलेशकुमार अग्रवाल र टुरिजम काउन्सिल अफ थाइल्यान्डका अध्यक्ष चाई अरुनानोनडिचाईले हस्ताक्षर गर्नुभयो ।
दुई मुलुकबिच पर्यटन प्रवर्धन, नागरिक उड्डयन एवं नेपालका विभिन्न क्षेत्रमा सांस्कृतिक प्रवर्धनका लागि सहकार्य गर्ने विषयमा समझदारी भएको नेपाल चेम्बर अफ कमर्सद्वारा जारी विज्ञप्तिमा उल्लेख छ ।
नेपाल र थाइल्यान्डका पर्यटकीय क्षेत्रको पहिचान र प्रवर्धन गर्दै संयुक्त रूपमा बजार प्रवर्धनात्मक अभियान, नागरिक उड्डयनको क्षेत्रमा संयुक्त सहकार्य, सम्पदा र संस्कृति आदानप्रदान, व्यापार एवं लगानी प्रवर्धन तथा क्षमता अभिवृद्धिका लागि सहकार्य गर्ने गरी समझदारी भएको हो । नेपालमा जैविक प्रविधिमार्फत खाद्यान्न उत्पादन वृद्धि गर्ने गरी जनता एग्रो एन्ड फरेस्ट्री र थाइल्यान्डको प्रमुख शैक्षिक संस्था कसेस्टार्ट विश्वविद्यालयबिच पनि सम्झौतापत्रमा हस्ताक्षर भएको छ ।
जनता एग्रोले नेपालमा गरिरहेको जैविक खेतीमा नवीनतम आधुनिक प्रविधि, उन्नत जातका बिरुवाको हेरचाह गर्ने नयाँ उपाय, फसल काट्ने नयाँ तरिका, उत्पादन तथा गुणस्तर वृद्धि गर्नेलगायतका क्षेत्रमा सहकार्य हुने जनाइएको छ ।
सम्झौतामा कसेस्टार्ट विश्वविद्यालयका उपाध्यक्ष डा. कृत वोन–इनल र जनता एग्रो एन्ड फरेस्ट्रीका अध्यक्ष पवन गोल्यानले हस्ताक्षर गर्नुभएको हो । यो साझेदारी नेपाली कृषि क्षेत्रको दिगो विकास, नयाँ कृषि प्रविधि र कृषकको जीवनस्तर सुधार्ने उद्देश्यले गरिएको जनता जनता एग्रो एन्ड फरेस्ट्रीका अध्यक्ष पवनकुमार गोल्यानले बताउनुभयो ।
