साहारा लिम्बू
फुङलिङ, फागुन १८ गते । आगलागीबाट पीडित भएका परिवारलाई पाथीभरा याङवरक गाउँपालिकाले राहत सामग्री प्रदान गरेको छ । अग्निपीडित पाथीभरा याङवरक गाउँपालिका –२ थेचम्बु ओलकका स्थानीय युवराज तामाङको परिवारलाई गाउँपालिकाले आज राहत सामग्री उपलब्ध गराएको हो ।
गाउँपालिका अध्यक्ष केशरकुमार मेन्याङबो स्वयम् उपस्थित भएर राहत सामग्री हस्तान्तरण गरिएको उहाँको स्वकीय सचिव तेजवीर मेन्याङबोले जानकारी दिनुभयो । उहाँका अनुसार दैनिक उपभोग्य सामग्री अन्तर्गत चामल ५० केजी, दाल ५ केजी, नुन २ केजी, खानेतेल २ लिटर लगायतका वस्तु प्रदान गरिएको छ ।
त्यस्तै, किचनमा आवश्यक सम्पूर्ण भाँडा, थाललगायतका सामग्रीसमेत एक–एक थान हस्तान्तरण गरिएको पालिकाले जनाएको छ । त्यस्तै पालिकाले परिवारका सदस्यलाई एक–एक थान लत्ताकपडा जुत्ताचप्पल उपलब्ध गराएको छ ।
गाउँपालिकाको केन्द्रमा प्राप्त सम्पूर्ण सामग्री तत्काल खरिद गरी प्रदान गरिएको बताइएको छ । बाँकी रहेको सिरक, डस्नाजस्ता ओढ्ने ओछ्याउने सामग्री सदरमुकामबाट खरिद गरिएको र आइपुग्नासाथ प्रदान गर्ने तयारी रहेको स्वकीय सचिव मेन्याङबोले जानकारी दिनुभयो । यस्तै, घर पुनः निर्माणका लागि गाउँपालिकाले नगद ६० हजार रुपियाँ उपलब्ध गराउने भएको छ । पालिकाभरिका नागरिकको घरमा आगलागी भए प्रत्येक परिवारलाई पुनः निर्माणका लागि ६० हजार रुपियाँ दिने व्यवस्था गरेअनुसार नै सो रकम उपलब्ध गराउने तयारी गरेको छ ।
विद्युत् सर्ट भएर तामाङको घरमा हिजो करिब साढे १ बजे आगलागी भएको प्रहरीले जनाएको छ । प्रहरीका अनुसार आगलागीबाट करिब २ लाख ३० हजार रुपियाँभन्दा बढीको क्षति भएको छ । घरमा रहेका सामग्रीहरू जलेर नष्ट हुँदा उक्त रकम बराबरको क्षति भएको विवरण प्रहरीले सार्वजनिक गरेको छ ।
