स्थानीय उत्पादन उपभोक्ताको रोजाइ

लीलाधर वली   

घोराही, फागुन १६ गते । दाङको घोराहीमा सञ्चालित छैटाैं कृषि, पर्यटन तथा व्यापार महोत्सव–२०८१ मा स्थानीय उत्पादनका सामग्री उपभोक्ताको प्राथमिकतामा पर्ने गरेका छन् । 

दाङ जिल्ला उद्योग वाणिज्य सङ्घको आयोजनामा फागुनको २ गतेदेखि १८ गतेसम्म सञ्चालित महोत्सवमा जिल्लाभित्रका साथै छिमेकी जिल्लाबाट आएका कृषि, हस्तकला तथा घरेलु उत्पादनका सामग्रीहरु उपभोक्ताको रोजाइमा पर्ने गरेका छन् । 

महोत्सवमा स्थानीय उत्पादन अचारको कारोबार राम्रो भइरहेको अर्गानिक कृषि उपज तथा प्रशोधन बजार केन्द्र घोराहीकी सञ्चालिका गीता रावत बताउनुहुन्छ । घोराही बजारमा विगत पाँच वर्षदेखि अचार उत्पादन गरेर बिक्री गर्दै आउनुभएकी रावतले महोत्सवमा स्टल राखेको र दैनिक १० देखि २० हजारसम्मको अचार बिक्री भइरहेको बताउनुभयो । 

महोत्सवमा अन्य सामग्रीको तुलनामा स्थानीय उत्पादनका सामग्रीहरु राम्रो बिक्री भइरहेको भन्दै उहाँले भन्नुभयो, "महोत्सवमा अचारको राम्रो प्रचारप्रसारसँगै बिक्री भइरहेको छ ।" उहाँले महोत्सवमा अकबरे खुर्सानी, तामा, आँप, मुला, गाँजर, गोभीलगायतका अचार बिक्रीका लागि राख्नुभएको छ ।

अचारसँगै दाङको चिनारीका रुपमा रहेको सिम्ठारो र तिल्की धानको चामल पनि महोत्सवमा आउनेले लग्ने गरेको बताउनुहुन्छ । महोत्सवमा आउँने धेरै जना स्टलमा आउने र खरिद गर्ने गर्नुभएको भन्दै कतिपयले भने पुरानो धानका रुपमा रहेको सिम्ठारो,तिल्कीलगायत अचारका बारेमा बुझ्नका लागि समेत आउने गरेको बताउनुहुन्छ । 

अचारसँगै महोत्सवमा घर सजावटका लागि आवश्यक पर्ने पुष्प व्यवसायको पनि राम्रो व्यापार भएको जलजला पुष्प खेती फार्मका सञ्चालक लोकेन्द्र पुन बताउनुहुन्छ । घर, बगैंचा, कार्यालयलगायतका सजावटका लागि प्लाष्टिकभन्दा अर्गानिक पुष्पको प्रयोग बढ्दै जाँदा महोत्सवमा कारोवार राम्रै भइरहेको उहाँले बताउनुभयो । 

गतवर्षको महोत्सवमा पनि पुष्प बिक्री गरेको भन्दै पुनले भन्नुभयो, "पुष्प व्यवसाय फरक खालको व्यापार भए पनि महोत्सवमा राम्रै बिक्री भइरहेको छ । बजारदेखि गाउँबाट आउने मानिसका लागि आकर्षण बनेको छ ।" उहाँका अनुसार दैनिक २० हजारमाथिको कारोबार भइरहेको बताउनुभयो । 

त्यसैगरी महोत्सवमा माटोका सामग्रीले पनि दर्शकको ध्यान तान्ने गरेका छन् । गढवा गाउँपालिकामा ३ बाट लालीगुँरास कृषक समूह तथा दियावाटी कृषक समूहले महोत्सवमा राखेका स्टलबाट पाला, गर्मी समयमा पानी खानका घइटा, करुवा, भुर्की, ठेकी, मट्टेलगायतका सामग्री बिक्री भइरहेको लालीगुँरास कृषक समूहका सदस्य शेरबहादुर चौधरी बताउनुहुन्छ । घरबाटै बिक्री गर्दा टाढा भएकाले खासै कोही नजाने भएकाले चाडपर्वको समयमा मात्र बिक्री हुने गरे पनि महोत्सवमा अहिले व्यापारसँगै प्रचारप्रसार भएको बताउनुहुन्छ । 

घरका लागि आवश्यक पर्ने माटाका भाँडाहरु दैनिक पाँच हजारदेखि दश हजारसम्म बिक्री भइरहेको बताउनुभयो । प्लाष्टिक, स्टिललगायतका भाँडाको तुलनामा कम बिक्री भए पनि माटोको महत्व बुझेको र आकर्षक देखिने भएकाले माटोका भाँडाहरु किन्ने गरेको बताउनुहुन्छ । 

उद्योग, व्यापार कृषि र पर्यटन क्षेत्रको विकासका लागि महोत्सवमा स्थानीय उत्पादनलाई प्राथमिकता दिएर ३४ वटा कृषि, हस्तकला र लघु उद्यमसँग सम्बन्धित स्टलहर राखेको महोत्सव मूल आयोजक दाङ जिल्ला उद्योग बाणिज्य सङ्घका अध्यक्ष वसन्त जोशी बताउनुहुन्छ । व्यापार व्यवसायको प्रवर्धनसँगै स्थानीय उत्पादनको विकास र प्रचारप्रसार गर्न आवश्य भएकाले दाङसँगै छिमेकी जिल्लामा उत्पादन भएका कृषि, जडीबुटी, लद्युउद्यम,हस्तकलाका सामाग्रीलाई महोत्सवमा राखिएको बताउनुभएको छ ।