पूर्वपश्चिम लोकमार्ग स्तरोन्नति : तीन दर्जन पुल बन्ने

रवीन्द्र उप्रेती

बर्दिबास, फागुन ४ गते । पूर्वपश्चिम राजमार्गको कमला–ढल्केबर–पथलैया सडक आयोजना पूर्वी खण्डमा नयाँ पुल निर्माण सुरु गरिएको छ । स्तरोन्नतिको चरणमा प्रवेश गरेको धनुषाको कमलादेखि सर्लाहीको बागमतीसम्म ७४.७५ किलो मिटर पूर्वी खण्डमा ३४ वटा नयाँ पुल थपिने भएको हो । 

यसमध्ये बर्दीबासको रातु र बडहरी खोलामा नयाँ पुल निर्माण सुरु भइसकेकोे छ । अन्य खोलामा पनि सम्बद्ध ठेकेदारहरुले सुरसार गरेको जनाएका छन् । गौरीडाँडास्थित कमला–ढल्केवबर–पथलैया सडक आयोजना (पूर्वी खण्ड) का आयोजना प्रमुख छविलाल पौडेलका अनुसार पूर्वी खण्डमा रहेका पुराना पुलको समानान्तर नयाँ पुल बनाउन लागिएको हो । 

यो खण्डमा हाल ४१ पुल सञ्चालनमा छन् । यीमध्ये ७ ठाउँमा साना पुल रहेको र कतिपय ठाउँका खोलाले हैसियत पनि गुमाइसकेको हुँदा साना पुलको साटो बक्स कल्भर्ट बनाउन लागिएको हो । त्यस्तै पूर्वी खण्डमा रहेका १४ वटा पुराना कजवेलाई पनि बक्स कलर्भटमा परिणत गरिने उहाँले बताउनुभयो । यसबाहेक कमला र बागमती खोलामा सिग्नेचर पुल निमार्णको योजना भए पनि यी दुवै पुलको ठेक्का भने लागिनसकेको गौरीडाँडास्थित कमला–ढल्केबर–पथलैया सडक आयोजना (पूर्वी खण्ड) ले जनाएको छ ।

आयोजना प्रमुख पौडेलका अनुसार नदी खोलाका पुलबाहेक धनुषाको वीरेन्द्रबजार तथा सर्लाहीको लालबन्दी, नवलपुर, हरिवन र नयाँरोड जङ्सनमा ‘अन्डर पास’ निर्माणको तयारी गरिएको छ । यी ठाउँमा सवारी आवागमनका लागि ‘भेहिकुलर अन्डरपास’ र पैदल यात्रुका लागि ‘प्यासेन्जर अन्डरपास’ बनाउने तयारी गरिएको छ । 

पौडेलले भन्नुभयो, "एसियाली मापदण्ड अनुसार स्तरोन्नति गरिने यो राजमार्गमा सहज आवागमन र दुर्घटना न्यूनीकरणलाई पनि प्रमुख प्राथमिकतामा राखिएकाले यात्रुको बढी चाप हुने बजार क्षेत्रमा अन्डरपास बनाउन लागिएको हो ।"

विश्व वैंकको १८ अर्ब ६० करोड ऋण सहयोगमा पूर्वी खण्डको सन् २०२५ जनवरी १ तारिखदेखि स्तरोन्नतिको चरणमा प्रवेश गरिसकेको छ । यो खण्डमा सडक स्तरोन्नति र नयाँ पुल निर्माण साथसाथै लाने योजना रहे पनि सडक मार्गमा घरटहरा, विद्युत् पोल, रुखलगायतका अनेकन अवरोध तत्काल समाधान गर्न नसकिने भएपछि पुल निर्माणलाई प्राथमिकतामा राखेर काम अघि बढाएको पौडेलले जनाउनुभयो । उहाँले भन्नुभयो, ‘पुल निर्माण पनि आयोजनाभित्रकै प्रमुख पाटो हो । यसबिच पुलको काम सम्पन्न गर्न सकियो भने सडक स्तरोन्नतिलाई एकलौटीरुपमा अघि बढाउने मौका पाइन्छ ।’