फरक क्षमता भएका विद्यार्थीलाई सहयोग

कविराज घिमिरे 

हिले, फागुन ३ गते । डेरी एसोसिएसन धनकुटाले धनकुटा नगरपालिका –१० मा रहेको आधारभूत विद्यालयका विद्यार्थीलाई कपडा तथा खाद्यान्न वितरण गरेको छ ।

विद्यालयमा अध्यनरत बौद्धिक अपाङ्गता तथा सुस्त मनस्थिति भएका ३५ जना विद्यार्थीलाई लक्षित गरी २० थान तन्ना तथा खाद्यान्न वितरण गरेको हो । जाडो मौसममा विद्यार्थीलाई केही राहत होस् भन्ने उद्देश्यले कपडा र खाद्यान्न वितरण गरिएको एसोसिएसनका अध्यक्ष राजु घिमिरेले बताउनुभयो ।

विद्यालयमा अध्ययरत विद्यार्थीलाई पर्याप्त स्रोत नहुँदा आवासमा समस्या रहेको छ । बौद्धिक अपाङ्गता सुस्त मनस्थिति स्रोत कक्षा सञ्चालन भइरहेको विद्यालयमा सरकारी निकायबाट आएको बजेटले पर्याप्त मात्र नपुगेको र दाताहरूको सहयोगले केही राहत पुगेको विद्यालयका प्रधानाध्यापक विनोद सुवेदीले बताउनुभयो । 

बौद्धिक अपाङ्गता सुस्त मनस्थिति स्रोत कक्षा रहेको यस विद्यालयमा विभिन्न दाताहरूले सहयोग समेत गर्दैआएका छन् । स्रोत कक्षामा अध्ययनरत ३५ जना विद्यार्थी आवासीय रूपमा अध्ययन गर्दै आएका छन् । विद्यालयमा धनकुटासहित तेह्रथुम, भोजपुर, मोरङ र सुनसरीलगायतका कोशी प्रदेशमा रहेका जिल्लाका विद्यार्थी अध्ययनरत रहेका छन् ।

डेरी एसोसिएसनले गरेको उक्त कपडा तथा खाद्यान्न एसोसिएसनका अध्यक्ष घिमिरे, उपाध्यक्ष डिबी तामाङ, सचिव मकरबहादुर मगर र सदस्य मानबहादुर मगरलगायतले हस्तान्तरण गर्नुभएको थियो ।