मालपोत कार्यालय लहानको कामकाज प्रभावित

जीवछ यादव

लहान, माघ ३० गते । गाउँ ब्लक जग्गा फुकुवाको माग गर्दै लहान नगरपालिकाको २४ वटै वडाका स्थानीयहरूले सङ्घर्ष समिति गठन गरेर लहान स्थित मालपोत कार्यालय अगाडि धर्नामा बसेपछि दुई दिनदेखि नियमित कामकाज प्रभावित भएको छ ।  

जायज मागहरू पूरा नभएसम्म धर्ना कार्यलाई अघि बढाइरहने सङ्घर्ष समितिका संयोजक लहान नगरपालिका–६ का पूर्व वढाध्यक्ष नेपाली कांग्रेसका नेता अरुण केसीले बताउनुभयो । उहाँका अनुसार हाम्रो मागलाई पटक पटक बेवास्ता गरीरहँदा बाध्य भएर आन्दोलनमा उत्रिनु परेको छ । जग्गा फुकुवा नहुँदा बैंकबाट कारोबार गर्न नसक्ने, छोरा छोरीको विवाह शिक्षा र भइपरी आएका समस्याहरू टार्न ठुलो समस्या भएपछि बाध्य भएर आन्दोलन गर्नु परेको उहाँको भनाइ छ ।

लहान नगरपालिकका पन्ध्र हजार घरपरिवारको यो समस्या भएकोले धर्ना कार्यक्रममा उपस्थिति भएर लहान नगरपालिकाबाट समर्थन गरेको लहान नगरपालिका उपप्रमुख राम चलितर महतोले बताउनुभयो । उहाँले भन्नुभयो, ‘यो समस्या समाधान गर्नका लागि बिस वर्षदेखि नै सम्बन्धित मन्त्रालय विभाग हरेक ठाउँमा पुगेर थालेको प्रयास सफल हुन सकेपछि आन्दोलनलाई लहान नगरपालिकाले उचित ठानेर समर्थन गरेका छौं । 

लहान नगरपालिकाका वर्तमान वडाध्यक्षहरू क्रमशः रमेश गौतम वडा नं ६ न्यायिक समिति सदस्य महेन्द्र ठाकुर,नेपाली कांग्रेसको पुरानो नेता रामसुन्दर चौधरी, लहान–५ का पूर्व वडाध्यक्ष मो सेलेमान अन्सारी नेपाली कांग्रेस नगर सभापति सञ्जयकुमार यादवले भौतिक र नैतिक समर्थन नै गरेका छौँ ।’

गाउँब्लक सङ्घर्ष समितिले थालिएको आन्दोलनमा मालपोत कार्यालय लहान शाखामा रहेको लेखापढी व्यावसायी सङ्घको समेत समर्थन रहेको सङ्घको अध्यक्ष रामनारायण यादवले बताउनुभयो । "लेखापढी व्यावसायीहरू लहानका २४ वटै वडाका पीडितहरूको समस्या सुनेको मात्रै होइन, महसुस समेत गरेकोले धर्नामा बसेका स्थानीयहरूलाई साथ समर्थन दिन धर्नामा बसेका छौं," अध्यक्ष यादवले भन्नुभयो । 

माघ २९ गतेदेखि मालपोत कार्यालयको मूल प्रवेशद्वारमा धर्ना बसेपछि कार्यालयमा कार्यहरू थप भएको मालपोत कार्यालय प्रमुख अर्जुन मण्डलले बताउनुभयो । यो समस्या समाधानका लागि सम्बन्धित निकायबाट पहल गरिरहेको उहाँले भन्दै धर्ना कार्यले कार्यालयको कामकाज ठप्प भएको सुनाउनभयो । उहाँले भन्नुभयो, "यस विषयमा माथिको निर्देशन आएपछि मात्रै समस्या समाधान गर्न सकिने देखिन्छ । यो लहानको समस्या मात्रै नभएर देशव्यापी समस्याको रूपमा रहेको छ ।"