सहकारीपीडितबाट निवेदन आह्वान

म्याग्दी समाचारदाता

म्याग्दी, माघ २६ गते । आर्थिक अपचलन भएको भन्दै पाँच जनालाई गिरफ्तार गरेर अनुसन्धान अगाडि बढाइएको बेनी नगरपालिका–८ मा रहेको कुमारी बहुउद्देश्यीय सहकारी संस्था लिमिटेडका बचतकर्तालाई प्रहरीले निवेदन दिन आह्वान गरेको छ । 

सहकारी संस्थाका पूर्वसञ्चालक समिति तथा पूर्वव्यवस्थापकलाई समेत गिरफ्तार गरी अनुसन्धान थालेको प्रहरीले सहकारीमा रकम जम्मा गरेको आधार देखिने पासबुक, भौचर, स्टेटमेन्ट, मुद्दती प्रमाणपत्रलगायतका प्रमाणको सक्कलसहित निवेदन दिन सूचना गरेको छ । बचतकर्तालाई रकम जम्मा गरेका प्रमाणको सक्कल प्रतिसहित प्रहरी कार्यालयमा उपस्थितिका लागि आह्वान गरिएको हो ।

जिल्ला प्रहरी कार्यालय म्याग्दीले २० गते संस्थाका पूर्वअध्यक्ष रघुगङ्गा गाउँपालिका–५ झिँका ६७ वर्षीय मनप्रसाद थजाली, पूर्वउपाध्यक्ष बेनी नगरपालिका–१, रत्नेचौरका ३६ वर्षीय राजकुमार थापालाई गिरफ्तार गरेको थियो । 

सोही दिन अन्नपूर्ण गाउँपालिका–७, हिस्तानका ६६ वर्षीय थमबहादुर गर्बुजा, संस्थाका पूर्वव्यवस्थापक (प्रबन्धक) पर्वत लेखफाँटका ५३ वर्षीय रुद्रबहादुर गुरुङ र बेनी नगरपालिका–१, रत्नेचौरकी ४९ वर्षीय देवीकुमारी थापालाई गिरफ्तार गरिएको थियो ।

सहकारीका वर्तमान तथा पूर्वपदाधिकारीले आर्थिक अपचलन गरेको भन्दै गएको २० गते आइतबार पाँच जनालाई गिरफ्तार गरेको प्रहरीले सहकारी संस्थामा रहेका प्रमाण दुरुपयोग हुन सक्ने आशङ्कासहित गत बुधबार २३ गते सहकारी सिल गरेको थियो । साथै २१ माघकै मितिमा प्रहरीले सहकारीपीडितलाई निवेदन दिनसमेत आह्वान गरेको छ ।

जिल्ला प्रहरी कार्यालय म्याग्दीका सूचना अधिकारी प्रहरी निरीक्षक (इन्स्पेक्टर) सागर पौडेलका अनुसार थप अनुसन्धान गर्नका लागि सहकारी सिल गर्नुका साथै जिल्ला अदालतबाट पाँच दिनको म्याद थप गराइएको छ । 

पहिलो पटक आइतबारै तीन दिनको म्याद थप गरी अनुसन्धान थालेको प्रहरीले बुधबार पुनः जिल्ला अदालत म्याग्दीबाट पाँच दिनको म्याद थप गरेर अनुसन्धान अगाडि बढाएको जनाएको छ । सहकारी रजिस्ट्रार कार्यालय पोखराको चलानी नं. ४१२ मिति २०८१ माघ १८ गतेको पत्रका आधारमा सहकारीका सञ्चालक तथा व्यवस्थापकलाई गिरफ्तार गरेको प्रहरीले जनाएको छ । 

जिल्ला प्रहरी कार्यालय म्याग्दीका सूचना अधिकारी सागर पौडेलले पीडितबाट माग गरे अनुसार निवेदनहरू आउने क्रम जारी रहेको बताउनुभयो । सञ्चालकहरूले केही बचतकर्ताको रकम फिर्ता पनि गरेको हुनाले फिर्ता हुन बाँकीको निवेदन माग गरिएको उहाँको भनाइ छ ।