विजयकुमार साह
ढल्केबर, पुस २९ गते । धनुषामा कार र मोटरसाइकल ठोक्किँदा मोटरसाइकलमा सवार एक जनाको मृत्यु भएको छ भने अर्को गम्भीर घाइते भएका छन् ।
वीरेन्द्र बजार–महिनाथपुर सडक खण्डअन्तर्गत सबैला नगरपालिका–१० को सिमरारी र शहीदनगर नगरपालिकाको हौवाहीको बिचमा आइतबार साँझ दुर्घटना भएको हो । उत्तरबाट दक्षिणतर्फ जाँदै गरेको बागमती प्रदेश ०१–०२७ च ८२२९ नम्बरको कार र दक्षिणबाट उत्तरतर्फ गइरहेको ज ११ प ७७९६ नम्बरको एफजेड मोटरसाइकल एकापसमा ठोक्किएका थिए । मोटरसाइकलले कारको दाहिने भागमा ठोक्किँदा दुर्घटना भएको प्रहरीले जनाएको छ ।
दुर्घटनाबाट घाइते भएका मोटरसाइकलमा सवार अमनकुमार साह र आकाशकुमार जयसवाललाई प्रादेशिक अस्पताल जनकपुर पठाइएको थियो । चिकित्सकले साहलाई मृत घोषण गरेको प्रहरीले जनाएको छ । गम्भीर घाइते जायसवालको सोही अस्पतालमा उपचार भइरहेको छ ।
इलाका प्रहरी कार्यालय सबैलाका प्रहरी निरीक्षक दीपक क्षेत्रीका अनुसार दुर्घटनामा सङ्गलग्न कार र त्यसका चालकलाई नियन्त्रणमा लिइएको छ ।
