रेखीराम राना
तानसेन, पुस १७ गते । पोखराबाट पाल्पा हुँदै सुनौलीतर्फ गइरहेको भारतीय स्कार्पिओ दुर्घटनामा परेको छ । सिद्धार्थ राजमार्ग हुँदै सुनौलीतर्फ गइरहेको बिआर २२ बिडी २०३० नम्बरको भारतीय स्कार्पियो बगनासकाली गाउँपालिका–३, आर्यभाङ्ज्याङ् नजिकै बुधबार बेलुकी ७ बजेतिर दुर्घटनामा परेको हो । दुर्घटना परी छजना घाइते भएका छन् ।
स्कार्पिओ सडकदेखि १५० मिटर तल खसेको जिल्ला ट्राफिक प्रहरी कार्यालय पाल्पाका प्रमुख रामप्रसाद खनालले जानकारी दिनुभयो । दुर्घटनामा परी छजना भारतीय नागरिक घाइते भएको खनालले जानकारी दिनुभयो । घाइतेको अवस्था भने सामान्य रहेको छ ।
घाइतेलाई उद्धार गरी उपचारका लागि लुम्बिनी मेडिकल कलेज प्रभासमा पठाइएको छ । दुर्घटना के कारणले भएको भन्नेबारेमा अनुसन्धान भइरहेको प्रहरीले जनाएको छ ।
