पत्रकारिता क्षेत्रको विकासमा प्रदेश सरकार प्रतिबद्ध छ : मुख्यमन्त्री सिंह

धर्बेन्द्र झा

जनकपुरधाम, पुस १५ गते । मधेश प्रदेशका मुख्यमन्त्री सतिशकुमार सिंहले पत्रकारिता क्षेत्रको समग्र विकासका लागि प्रदेश सरकार प्रतिबद्ध रहेको बताउनुभएको छ । 

मधेश प्रदेशको राजधानी जनकपुरधाममा सोमबार नवनिर्वाचित नेपाल पत्रकार महासंघ मधेश प्रदेश कार्यसमितिलाई प्रमाणपत्र वितरण तथा पद हस्तान्तरण समारोहमा उहाँले सो कुरा बताउनुभएको हो ।

उहाँले सत्य तथ्य उजागर गर्ने पत्रकारको दायित्व भएको भन्दै मधेश प्रदेशमा राम्रा कामहरु हुँदा पनि त्यसको उजागर नभई नकारात्मक सूचना बढी प्रवाह हुने गरेकाले त्यसतर्फ ध्यान दिनुपर्ने आवश्यकतामा जोड दिनुभयो । उहाँले सत्य तथ्य बुझेर मात्र समाचार सम्प्रेषण हुँदा आम नागरिकमा भ्रम सृजना नहुने धारणा पनि राख्नुभयो ।

मधेश प्रदेशमा नेपाल पत्रकार महासंघको भवन निर्माणका लागि ८० लाख रकम विनियोजन गरेको बताउनुभयो । उहाँले प्रदेश सरकारले मधेश प्रदेशका पत्रकारलाई स्वास्थ्य र दुर्घटना विमा गराउने प्रक्रियाको समेत शुरुवात गरिसकेको भन्दै त्यसमा मधेश प्रदेशका सबै पत्रकारलाई सहभागी हुन आग्रह गर्नुभयो ।

कार्यक्रममा नेपाल पत्रकार महासंघका केन्द्रिय सचिव अशोक तिवारीले पत्रकारको विकास र समृद्धिका लागि महासंघ तदारुकताका साथ अघि बढने बताउनुभयो । मधेश प्रदेशका श्रम तथा यातायातमन्त्री कौशलकिशोर राय, जनकपुरधाम उपमहानगरपालिकाका नगर प्रमुख मनोज साह, नेपाल पत्रकार महासंघ लेखा समितिका संयोजक केसी लामिछानेसहित नेपाल पत्रकार महासंघ र पत्रकारको हितमा काम गर्ने विभिन्न संघ संगठनका प्रमुख एवम पदाधिकारीले नवनिर्वाचित कार्य समितिका पदाअधिकारी तथा सदस्यहरुलाई शुभकामना र बधाई दिनुभएको थियो ।

नवनिर्वाचित पदाअधिकारी र सदस्यलाई प्रदेश निर्वाचन समितिका संयोजक एवम बरिष्ठ पत्रकार रामभरत साहले प्रमाणपत्र प्रदान गर्नुभएको थियो । दोस्रो सत्रमा नव निर्वाचित पदाअधिकारी र सदस्यलाई बधाई तथा शुभकामना दिइएको थियो । पहिलो सत्रको अध्यक्षता निर्वतमान प्रदेश अध्यक्ष एवम केन्द्रिय सदस्य राजेश कर्णले गर्नु भएको थियो । दोस्रो सत्रको अध्यक्षता नवनिर्वाचित मधेश प्रदेश अध्यक्ष श्याम बन्जाराले गर्नुभएको थियो ।