सम्राटको ‘अस्ति भन्दा’

गोरखापत्र समाचारदाता

काठमाडौँ, पुस ८ गते । बाल कलाकार सम्राट दाहालको एकल अभिनयमा नयाँ गीत ‘अस्ति भन्दा’ सार्वजनिक भएको छ । गीतको भिडियोलाई सम्राट क्रिएसनको युट्युब च्यानलबाट सार्वजनिक गरिएको हो । गीतमा नेपाल आइडल सिजन–५ का विजेता करण परियारको स्वर रहेको छ भने दीपक शर्माको सङ्गीत रहेको छ । किशोर मनोविज्ञानमा आधारित भएर तयार गरिएको गीतलाई निर्देशक सुमन दाहालले लेख्नुभएको हो । भिडियोमा निर्देशन पनि सुमनकै रहेको छ । किशोरावस्थामा प्रवेश गर्दा शारीरिक र मानसिक विकासमा आएका परिवर्तनले जीवनमा ल्याउने कौतूहललाई गीतमा प्रस्तुत गरिएको सुमनले बताउनुभयो । पवन गौतम र चाल्र्स मोरल्यान्ड तृतीयले भिडियो छायाङ्कन गर्नुभएको छ ।