जीवनको सत्य

शारदाकुमारी मानन्धर 

आस्था हुन्छ कहाँ कहाँ, भन्नै सकिँदैन ।

छेक्छ बाटो सबतिर, हिँड्नै सकिँदैन ।।

भोकतिर्खा के हो के हो, बुझ्नै सकिँदैन ।

मानव हो कि अमानव, चिन्नै सकिँदैन ।।

आवेशमा सही गलत, केही छुट्टिदैन ।

मानिसको भावनालाई, जान्नै सकिँदैन ।।

सत्यतालाई दोषले, गलाउन सक्दैन ।

असत्यको अस्तित्व सर्वदा, हुँदै हुँदैन ।।

सूर्यदेवलाई हत्केलाले, छेक्नै सकिन्न ।

चन्द्रदेवको शीतलता, दिनमा देखिन्न ।।

समयको गति यो रोक्न, कसैले सक्दैन ।

सेवाको भावविना कोही मानव बन्दैन ।।

आफ्नो देश, संस्कृति, बिर्सनै सकिन्न ।

धर्म, कर्म, भेषभूषा, त्याग्न पनि हुँदैन ।।

कहिल्यै पनि आफ्नोपन, छोड्नै हुँदैन ।

सत्यलाई कहिल्यै उपेक्षा, गर्नै हुँदैन ।।

पाको, न्यूरोड काठमाडौं ।