मनको कुनाबाट
तिमीलाई चियाउन मन छ ।
अँधेरीमा तिम्रा आहट
सुनिरहन मन छ ।
तिम्रा ती शब्द र स्वर सम्झिँदै
मौनतामा
तिनीहरूसँगै भलाकुसारी गर्न मन छ
शीतल हावासँगै आएको
तिम्रो सम्झनामा
केही आफ्नोपन मिसाएर
तिमीमै विलीन हुन मन छ ।
नभेटिए पनि तिमीलाई
भित्रैदेखि महसुस गर्न मन छ
होसदेखि बेहोसीसम्म
हररात तिमीलाई नै पुकार्न मन छ ।
सपनाहरू किन नटुक्रिऊन्
सांसारिक बाधा अडचनले
हरपल
मनभित्र तिमीलाई नै सजाउन मन छ
तिम्रै मिठासले यो मन बहकाउन मन छ ।
सबै सीमा मिच्दै यी आँखा
तिमीतिरै पुर्याउन मन छ
मनका कुनाबाट
तिमीलाई फेरि एक पटक
निर्धक्क चियाउन मन छ ।
