स्कुल बसले ठक्कर दिँदा मोटरसाइकल चालकको मृत्यु

भावना जोशी
अत्तरिया, मङ्सिर २० गते । स्कुल बसको ठक्करबाट कैलालीमा एक युवकको मृत्यु भएको छ । लम्कीचुहा नगरपालिका–१० चुहास्थित भित्रि सडकखण्डमा स्कुल बसको ठक्करबाट जोशिपुर गाउँपालिका–७ बस्ने ३० वर्षीय एकतन चौधरी गम्भीर घाइते हुनुभएको थियो । घाइते चौधरीको टिकापुर अस्पतालमा उपचारको क्रममा मृत्यु भएको जिल्ला प्रहरी कार्यालय कैलालीका प्रवक्ता डीएसपी कबिन्द्रसिंह बोहराले जानकारी दिनुभयो ।

मप.०३–००१ क २९४१ नम्बरको सनराइज स्कुलको बसले विपरित दिशाबाट आउँदै गरेको से ३ प ४७९६ नम्बरको मोटरसाइकललाई ठक्कर दिएको थियो । मोटरसाइकल पछाडी सवार लम्कीचुहा नगरपालिका–६ पिपरकोटी बस्ने २४ वर्षीय विक्रम चौधरीको बर्दगोरिया अस्पताल बौनियामा उपचार भइरहेको डीएसपी बोहराले बताउनुभयो । बस र बस चालक घोडाघोडी नगरपालिका–२ बस्ने ४० वर्षीय भागिराम चौधरीलाई नियन्त्रणमा लिई आवश्यक अनुसन्धानभई रहेको प्रहरीले जनाएको छ ।