गुणबहादुर रोका
सुलीकोट, मङ्सिर १६ गते । गोरखामा उपनिर्वाचन भइरहेको गोरखा नगरपालिका – ५ मा मतदान जारी छ । वडा अध्यक्षको लागि भएको निर्वाचनमा बिहान ७ बजेबाट मतदान सुरु भएको छ । दुवै मतदान स्थलमा बिहान ८ बजेसम्म मतदाताको उपस्थिति बाक्लो नभए पनि ९ बजेबाट मतदान स्थलमा मतदाताकाे बाक्लो उपस्थिति देखिएको मुख्य निर्वाचन अधिकृत शिवबहादुर रानाभाटले जानकारी दिनुभयो ।
उहाँका अनुसार बिहान १० बजेसम्म शिवशक्ति आधारभूत विद्यालयको क बुथमा १६२ मत, सोही बुथको ख मा १७१ मत र गोरखकाली आधारभूत विद्यालय स्वाँरामा बुथमा १४६ मत गरी जम्मा ४ सय ७९ मत खसेको उहाँले बताउनुभयो ।
गोरखा नगरपालिका – ५ मा जम्मा २ हजार २ सय २५ जना मतदाताहरू रहेको मुख्य निर्वाचन अधिकृतको कार्यालयले जनाएको छ ।
अहिले मतदाताहरू लाइन बसेर मतदान गरिरहेका छन् । वडा अध्यक्ष पदका लागि नेपाली काङ्ग्रेसबाट भाइकाजी आले, नेकपा एमालेबाट दुर्गा राना, नेकपा माओवादी केन्द्रबाट विष्णु राना राष्ट्रिय स्वतन्त्र पार्टीबाट मङ्गल थापालगायतका उम्मेदारहरु छन् ।
