काठमाडौँ, मङ्सिर २ गते । संस्कृति, पर्यटन तथा नागरिक उड्डयन मन्त्रालयअन्तर्गत रहेको पर्वतीय प्रशिक्षण प्रतिष्ठानले मलेसियाको वन मन्त्रालयमा कार्यरत २१ कर्मचारीलाई उद्धार तालिम प्रदान गरेको छ ।
प्रतिष्ठानले मलेसियन सरकारको सहयोगमा ललितपुरको गोदावरी र भक्तपुरको नगरकोटमा नौ दिने उद्धार तालिम प्रदान गरेको हो । उक्त तालिममा सहभागी कर्मचारीलाई आज ऊर्जा, जलस्रोत तथा सिँचाइमन्त्री दीपक खड्काले प्रमाणपत्र वितरण गर्नुभयो ।
कार्यक्रममा ऊर्जामन्त्री खड्काले प्राकृतिक र सांस्कृतिक सम्पदाले भरिपूर्ण नेपाल पर्वतीय पदयात्राका लागि उत्कृष्ट गन्तव्य भएको बताउनुभयो । उहाँले सुरक्षित र दिगो हिमाली पर्यटन सुनिश्चित गर्न तथा दक्ष जनशक्ति उत्पादनमा पर्वतीय प्रशिक्षण प्रतिष्ठानले खेलेको भूमिका महत्त्वपूर्ण भएको बताउनुभयो । तालिमले दीर्घकालीन पर्यटन विकासमा सहयोग पुग्ने मन्त्री खड्काको भनाइ थियो ।
मन्त्री खड्काले यस्ता तालिमले नेपाल र मलेसियाबिचका सम्बन्धलाई थप सुदृढ बनाएको बताउनुभयो । यस्ता पहलले हिमाली पर्यटन प्रवर्द्धन मात्र होइन अन्तर्राष्ट्रिय सहयोगलाई समेत बढवा दिने मन्त्री खड्काले बताउनुभयो । उहाँले भविष्यमा पनि यस्ता सहकार्य गर्न नेपाल तयार रहेको उल्लेख गर्नुभयो ।
वि.सं २०५८ मा स्थापना भएको प्रतिष्ठानले हालसम्म पाँच हजारभन्दा बढीलाई पर्वतीय पदयात्रा तालिम प्रदान गरिसकेको प्रतिष्ठानका अध्यक्ष उङ्दी छिरिङ शेर्पाले जानकारी दिनुभयो ।
साहसिक पर्यटनमा स्नातकोत्तरसम्मको अध्यापन गराउँदै आएको प्रतिष्ठानले ‘स्पेसल रेस्क्यु’ तालिमसमेत गराउँदै आएको छ । उक्त कार्यक्रममा प्रतिष्ठानका कार्यकारी निर्देशक अर्जुन राई, क्याम्पस प्रमुख शिवप्रसाद जैसी र नेपालस्थित मलेसियाका राजदूतावासका कर्मचारीको सहभागिता रहेको थियो । रासस
