चन्द्र पन्दाक
ताप्लेजुङ, भदौ १४ गते। ताप्लेजुङको आठराई त्रिवेणी गाउँपालिकामा हावाहुरीले स्थानीयको घरको छाना उडाएको छ। प्रहरीका अनुसार आठराई त्रिवेणी गाउँपालिका–५ चाँगेका स्थानीय चन्द्रबहादुर मगर र दिपेश अन्छङ्बो लिम्बूको घरको छाना उडाएको हो।
वर्षासँगै आएको हावाहुरीले जस्तापाता र खर (फुस) ले छाएको घरको छाना उडाएको चाँगेका वडाध्यक्ष लक्ष्मण राई (ललित) ले जानकारी दिनुभयो। जिल्ला प्रहरी कार्यालय ताप्लेजुङका सूचना अधिकारी एवम् प्रहरी निरीक्षक कमलकुमार लुङ्गेलीले मगरको जस्तापाताले छाएको घरको छाना उडाउँदा करिब एक लाख रुपियाँ बराबरको क्षति भएको बताउनुभयो।
प्रहरी निरीक्षक लुङ्गेलीका अनुसार हावाहुरीले लिम्बूको घरको छाना उडाउँदा पनि एक लाख रुपियाँ बराबरको क्षति भएको छ। घरमा बस्न नमिल्ने गरी हावाहुरीले छाना उडाएपछि लिम्बूको परिवार आफन्तको शरणमा बस्दै आएकाे प्रहरीले जनाएको छ।
