गुणबहादुर रोका
सुलीकोट, साउन १८ गते । गोरखाको पालुङटारमा एक वृद्धको शव फेला परेको छ । फेला परेको शव पालुङटार नगरपालिका–१ खोप्लाङका कोलकाटे निवासी ७० वर्षीय खिलबहादुर भुजेल रहेको जिल्ला प्रहरी कार्यालय गोरखाका प्रहरी नायव उपरीक्षक रमेश कुमार श्रेष्ठले जानकारी दिनुभयो ।
उहाँका अनुसार बिहिबार सामाजिक सुरक्षा भत्ता बुझ्न १ नम्बर वडा कार्यालयमा पुग्नुभएका भुजेल घर नफर्केपछि परिवारले प्रहरीमा जाहेरी दिएको थियो । उहाँलाई स्थानीयले खोज्दै जाँदा शुक्रबार बिहान ७ बजे खोप्लाङ स्वास्थ्य चौकीको झाडीमा शव भेटिएको उहाँले बताउनुभयो ।
स्वास्थ्य चौकीमा शव फेला पारेपछि आफन्त र स्थानीयले प्रहरीलाई जानकारी गराएका थिए । खबर पाए लगत्तै प्रहरी टोली घटनास्थल पुगी वृद्ध भुजेलको शव मुचुल्कापछि पोष्टमार्टमको लागि जिल्ला अस्पताल पठाइएको प्रहरीले जनाएको छ । घटनाको बारेमा थप अनुसन्धन भइरहेको जिल्ला प्रहरी कार्यालय गोरखाले जनाएको छ ।
