अनिल पराजुली
हेटौँडा, जेठ १० गते । मकवानपुरको मकवानपुरगढीबाट गोर्खा दरबारसम्म साइकल यात्रा सुरु गरिएको छ । हिमालयन राइडर्स सोसाइटी मकवानपुरको आयोजनामा २५६७ औँ बुद्धजयन्तीको अवसरमा दुईदिने साइकलयात्रा थालेको हो।
मकवानपुरगढी गाउँपालिका वडा नं. २ को समन्वयमा आन्तरिक पर्यटन प्रवर्द्धनका लागि ऐतिहासिक मकवानपुरगढीदेखि गोरखा दरबारसम्म साइकलयात्रा थालिएको हो । साइकलयात्रामा १२ जना सहभागी भएको सोसाइटीका अध्यक्ष रामकुमार श्रेष्ठले जानकारी दिनुभयो । मकवानपुरगढीबाट सुरु भएको साइकलयात्रा शुक्रबार साँझ गोरखा दरबार पुगेर समापन गरिने छ।
साइकलयात्रामा ६० वर्ष उमेर नाघेका ४ जना, ५० वर्ष उमेर पार गरेका ४ जना, ४० वर्ष र ३० वर्ष उमेर पार गरेका २/२ जनाले सहभागिता जनाउनुभएको छ ।
हिमालयन राइडर्स सोसाइटीले यसअघि चीनसँगको सीमाक्षेत्र रसुवागढीदेखि भारतको सीमाक्षेत्र ठोरीसम्म १० जनाको साइकलयात्रा गरेको थियो भने पूर्व मेचीदेखि पश्चिम महाकालीसम्म १३ जनाको समूहले साइकलयात्रा गरिसकेको छ ।
प्रत्येक शनिबार जिल्लाका धार्मिक एवम् पर्यटकीय क्षेत्रमा समेत नियमित साइकल यात्रा गर्दै आएको छ ।
