धनगढी समाचारदाता
धनगढी, वैशाख १७ गते । चर्को गर्मीसँगै कैलालीका विभिन्न स्थानमा आगलागीका घटना बढ्न थालेका छन् । केही दिनयता १६ स्थानमा आगलागी भएको प्रादेशिक विपत् कार्य सञ्चालन केन्द्रले जनाएको छ ।
सो कार्यालयका अनुसार आगलागीबाट लाखौँको धनमाल क्षति भएको छ । कतिपय विद्युत् सर्ट भई र धेरै ठाउँमा मानवीय लापर्बाहीका कारण आगलागी भइरहेको केन्द्रले जनाएको छ । गहुँको नल जलाउन कोहीकसैले खेतमा लगाएको आगो अन्यत्र सल्किएर धेरै ठाउँमा आगलागी भएको छ । यही १२ गते विभिन्न स्थानमा लागेको आगोबाट ६१ लाख पाँच हजार रुपियाँ बराबरको क्षति भएको छ ।
गोदावरी नगरपालिकास्थित प्रेरणा सपिङ सेन्टरमा अचानक आगलागी हुँदा ४५ लाख रुपियाँ बराबर, मोहन्याल गाउँपालिकाको बिचगडा र गोदावरी नगरपालिका–९, सेहरीस्थित लक्ष्मी सामुदायिक वनमा आगलागी हुँदा यत्तिको क्षति भएको अनुमान गरिएको छ । त्यस्तै बर्दगोरिया–२ स्थित गहुँको नल जलाउनका लागि लगाइएको आगो घरगोठमा सल्केपछि पशुचौपाया जलेर मरेका छन् । लम्कीचुहा नगरपालिका–८, गप्कास्थित खेतमा लागेको आगो पनि घरगोठमा पुगेपछि पशुचौपाया जलेर मर्नुका साथै गोठ, पराल नष्ट भएको छ ।
भजनी नगरपालिका–९, मन्त्रीफाँटास्थित गहुँ काटेको खेतमा आगलागी हुँदा राष्ट्रिय मावि ढुसीको १६ बिघा जमिनमा लगाइएको लेप्टिसको रुखका साथै एउटा कच्ची घर जलेको छ । किसानको चैते धान पनि जलेर नष्ट भएको छ ।
त्यस्तै वैशाख १४ गते कैलालीको विभिन्न ठाउँमा लागेको आगोले करिब १२ लाख १५ हजार रुपियाँ बराबरको क्षति भएको केन्द्रले जनाएको छ । भजनी नगरपालिका–५, लालबोझीमा विद्युत् सर्ट भई एक घरमा लागेको आगोले पाँच लाख रुपियाँ बराबरको क्षति भएको जनाइएको छ । सुक्खा गर्मीसँगै आगलागीका घटनाका कारण ठुलो मात्रामा धनमालको क्षति भइरहेको भजनीका अविनाश एचकेले जानकारी दिनुभयो । उहाँले खेतमा आगलागी हुँदा चैते धानसमेत जलेर नष्ट भएको उल्लेख गर्नुभयो ।
