चट्याङ लागेर वृद्ध बेहोस

राममणि दाहाल
हेटौँडा, वैशाख १ गते । मकवानपुरको भीमफेदी गाउँपालिका-८ स्थित शिरुडाँडामा चट्याङ लागेर एक वृद्ध बेहास हुनुभएको छ ।

स्थानीय ८१ वर्षीय सानुलाल सिङ गोले आफ्नै घरको पिढीमा बसिरहेको अव्स्थामा चट्याङ लागी बेहोस हुनुभएको बागमती प्रदेश प्रहरी कार्यालय, हेटौँडाले जनाएको छ ।

बिहीबार साँझ चट्याङ लागेर बेहोस भएका गालेलाई तत्काल आफन्तले प्राथमिक उपचार गरी थप उपचारका लागि शुक्रबार हेटौँडा अस्पताल ल्याई उपचार भइरहेको छ । प्रहरीका अनुसार गोलेको अवस्था मध्यम रहेको र बाहिरी चोट देखिएको छैन ।

यस्तै मकवानपुरको राक्सिराङ गाउँपालिका ८ स्थित धुसबगरमा चट्याङ लागेर दुई जना घाइते भएका छन् ।

चट्याङ लागेर स्थानीय वर्ष ३४ की सुस्मिता घलान र वर्ष १५ का सुवास घलान घाइते भएको बागमती प्रदेश प्रहरी कार्यालय, हेटौँडाले जनाएको छ ।

प्रदेश प्रहरी कार्यालयका अनुसार घाइते भएका दुवै जनालाई उपचारका लागि मनहरी अस्पतालमा ल्याइएकोमा सामान्य उपचारपछि थप उपचारका लागि चितवनस्थित सरकारी अस्पतालमा पठाइएको छ ।

दुवै जनाको शरीरको भित्री भागमा चोट लागेको छ । चट्याङ लागेर सोही स्थानका तिलकबहादुर घलानको एउटा बाख्रा मरेको प्रहरीले जानकारी दिएको छ ।