काठमाडौँ, चैत २० गते। एसएसएस फ्रेन्डसिप कप टी–२० क्रिकेटमा नेपालले गुजरातलाई १८२ रनको चुनौती दिएको छ। त्रिकोणात्मक सिरिज अन्तर्गत बुधबार भएको तेस्रो खेलमा नेपालले वापीस्थित साई मेघपन स्पोर्ट्सलाइफ मैदानमा गुजरातलाई ७ विकेटको क्षतिमा १८२ रनको चुनौती दिएको हो।
नेपालका लागि आसिफ शेख र कुशल भुर्तेलले शानदार अर्धशतक बनाउनुभयो। आसिफ शेखले ५१ बलमा सर्वाधिक ८५ रन बनाउनुभयो भने कुशल भुर्तेलले ४४ बलमा ६७ रन जोड्नुभयो। नेपालका ओपनर कुशल र आसिफले शानदार अर्धशतक बनाए पनि अन्य ब्याट्सम्यानले दोहोरो अङ्कमा रन जोड्न सकेनन्।
कप्तान रोहित पौडेल ७ बलमा ३ रन, सन्दीप जोरा ३ बलमा २ रन, कुशल मल्ल २ बलमा १ रन र गुल्शन झा ४ बलमा ४ रन बनाएर आउट हुनुभयो। अनिलकुमार शाह शून्यमा आउट हुँदा विवेककुमार यादवले नटआउट ५ बलमा ७ रन र प्रतिश जिसीले ३ बलमा ४ रन जोड्नुभयो। केही बेलमा गुजरातले नेपालले दिएको १८२ रनको लक्ष्य पछ्याउँदैछ।
गुजरातका लागि जयीतम पटेलले ४६ रन खर्चिएर ३ विकेट लिनुभयो भने ध्रुशान्त सोनीले २६ रन खर्चिएर २ विकेट लिनुभयो ।
