नेकपा (एमाले) बाट सिफारिस हुनु भएका महानगर प्रमुखका उम्मेदवार
नेकपा एमालेको शनिबार साँझसम्म बसेको सचिवालयको बैठकले पाँच महानगरपालिकाको प्रमुखको उम्मेदवारी नामावली टुंगो लगाएको लगाएको छ ।
नेकपा (एमाले)ले टुङग्यायो महानगर र उपमहानगरको उम्मेदवारी
नेकपा एमालेको शनिबार साँझसम्म बसेको सचिवालयको बैठकले पाँच महानगरपालिका र नौ वटा उपमहानगरपालिकाको प्रमुख र उपप्रमुखको उम्मेदवारीको नाम टुंगो लगाएको छ । बैठकको निर्णय बारे जानकारी गराउनु हुँदै एमालेका प्रचार विभाग प्रमुख पृथ्वी सुव्वा गुरुङले सिफारिस भएका नामवली सार्वजनिक गर्नु भएको
ओखलढुङ्गामा नेकपा एस र जसपा एक्ला एक्लै चुनाव लड्ने
ओखलढुङ्गामा नेकपा (एकीकृत समाजवादी) र जनता समाजवादी पार्टीले एक्ला एक्लै चुनावमा जाने तयारी गरेका छन् ।
उम्मेद्वार बन्न दल फेर्दै स्थानीय नेता
जानु पाण्डे कपिलवस्तु, वैशाख १० गते । स्थानीय निर्वाचनमा आफ्नो दलबाट टिकट नपाउँने संकेत मिले पछि कपिलवस्तुमा पार्टी परिवर्तन गर्ने लहर चल्न लागेको छ । उम्मेद्वार नहुने संकेत मिल्न लागेपछि जनप्रतिनिधि र राजनैतिक दलका नेताहरु धमाधम पार्टी परिवर्तन गर्न लागेको छन् । स्थानीय निर्वाचनको मनोनयन गर्ने दिन नजिकिदै जाँदा नेताहरुमा दल परिवर्तन गर्ने लहर चल्न लागेको छ । कपिलवस्तुमा गठबन्धन नहुने संकेत देखिएको र दल विच उम्मेद्वारीको आकांछी धेरै भएपछि आन्तरिक मिलाउन समेत सकस भएको छ ।जिल्लाको विजयनगर गाउँपालिकाको अध्यक्ष पदको उम्मेद्वार नहुँने भएपछि काँग्रेस नेता जानकी प्रसाद यादव जसपा प्रवेश गर्नु भएको छ । यादव अघिल्लो स्थानीय निर्वाचनमा स्वतन्त्र उम्मेद्वारी दिनु भएको थियो । निर्वाचनमा पराजय भए पछि काँग्रेस सांसद अभिशेख प्रताप शाहको पहलमा उहाँ काँग्रेस प्रवेश गर्नुभएको थियो । यादव काँग्रेस अधिवेशनमा क्षेत्रिय सभापतिमा समेत पराजित हुनु भएको थियो । यता यादव जसपा प्रवेश गरेपछि पार्टी समिति बेवास्था गरेको भन्दै विरोध प्रकट गरेका छन् । यसैगरी कपिलवस्तु नगरपालिका वडा नम्बर १ का वडा अध्यक्ष सुदीप पौडेल नगरप्रमुखको टिकट नपाउने भएपछि जसपा प्रवेश गर्नुभएको छ । उहाँ एक महिना अगाडि एमाले अध्यक्ष केपी शर्मा ओलीको हातबाट टिका लगाई एमाले प्रवेश गर्नुभएको थियो । पौडेल जसपा प्रवेश गरेपछि जसपाबाट नगरप्रमुखका आकांक्षी रामअचल यादवले जसपा त्यागेको घोषणा गर्नुभएको छ । यसैगरी कपिलवस्तुको महाराजगन्ज नगरपालिकाका दुई वडा अध्यक्ष र काँग्रेस क्षेत्रिय सचिवले पार्टी परित्याग गरेका छन् । वडा नं. ११ का वडा अध्यक्ष जगदिश तिवारी वडा नं. १ का अध्यक्ष शिवप्रसाद वानियाले काँग्रेस परित्याग गर्दै एमाले प्रवेश गर्नुभएको छ । यसैगरी क्षेत्रीय सचिव गंगेश नाथ तिवारी समेत एमाले प्रवेश गर्नुभएको हो । वडा अध्यक्षको उम्मेद्वार बन्नका लागि जसपा शिवराज नगरकमिटिका सचिव पारस केवट लोसपा प्रवेश गरेका छन् । केवट कार्यकर्ता माझ लोकप्रिय नेता रुपको चिनिदै आएका छन् । उहाँले पार्टी परित्याग गरेपछि जसपामा तरंग मच्चिएको छ ।
मनोनयन पत्र दर्ता आलोपालो गर्ने राजनीतिक दलको सहमति
बेलिना थापालमजुङ, बैशाख १० गते । लमजुङका क्रियाशील राजनीतिक दलहरुबीच बैशाख ३० गते हुने स्थानीय तह निर्वाचनका लागि मनोनयन पत्र दर्ता कार्य आलोपालो गर्ने सहमति भएको छ ।बैशाख ११ गते आइतबार र १२ गते सोमबार मनोनयन दर्ताको समय रहेको र एकै समयमा सबै राजनीतिक दलहरु आउँदा भिडभाड हुने भएकाले आलोपालो गर्ने निर्णय भएको छ । शनिबार जिल्ला समन्वय समिति लमजुङको सभाहलमा राजनीतिक दलहरुबीच छलफल गरी मनोनयन पत्र दर्ता गर्दा सबै राजनीतिक दलले एकै समयमा नगरी समय व्यवस्थापन गरी मनोनयन पत्र दाखिला गर्ने निर्णय भएको हो ।मुख्य निर्वाचन अधिकृत, जिल्ला न्यायाधीश शिवप्रसाद खनालका अनुसार एकै समयमा दर्ताको काम गर्दा समस्या हुन सक्ने भएकाले आलोपालो गर्ने सहमति गरिएको हो । उम्मेदवारको नाम दर्ता गर्दा सहज, सरल र छिटो बनाउन सहजीकरणका लागि राजनीतिक दलसँग छलफल गरेको उहाँले बताउनुभयो ।छलफलबाट राजनीतिक दलले निर्वाचन आचारसंहिता २०७८ लाई पूर्ण रुपमा पालना गर्ने प्रतिवद्धता जनाएका छन् । सबै राजनीतिक दलको तर्फबाट पूर्ण सहयोग गर्ने प्रतिवद्धता जनाएका छन् । मुख्य निर्वाचन अधिकृत खनालका अनुसार जिल्ला समन्वय समितिमा मुख्य निर्वाचन अधिकृतको कार्यालय र अन्य ७ पालिकामा मुख्य निर्वाचन अधिकृतको कार्यालय स्थापना भएर काम थालिएको छ । लमजुङमा १७ वटा राजनीतिक दल क्रियाशील रहेका छन् । एउटा पालिकामा प्रमुख-उपप्रमुख, अध्यक्ष-उपाध्यक्ष, वडाध्यक्ष, वडा सदस्य गरी एउटा पार्टीबाट ५७ जना उमेदवारले नाम दर्ता गराउनुपर्ने छ । लमजुङमा चार नगरपालिका र चार गाउँपालिका छन् ।मुख्य निर्वाचन अधिकृत शिवप्रसाद खनालको अध्यक्षतामा भएको छलफलमा नेकपा एमाले लमजुङका उपाध्यक्ष यशोदा रिमाल, नेपाली कांग्रेसका उपसभापति आनन्द घिमिरे, नेकपा माओबादी केन्द्र जिल्ला कमिटी सदस्य देबबहादुर गहतराज, जनसमाजवादी पार्टी नेपालका सूर्यबहादुर बुढापृथि, जनता समाजबादी पार्टीका उपाध्यक्ष नरेन्द्रबहादुर गुरुङ, नेकपा एकीकृत समाजवादीका हरिनिधी तिवारी, राप्रपाका उपसचिव बालचन्द्र श्रेष्ठ, मंगोल नेशनल जिल्ला सभाका अध्यक्ष विकास गुरुङ, प्रमुख जिल्ला अधिकारी सुशील बैद्य, जिल्ला निर्वाचन कार्यालय लमजुङका प्रमुख सिर्जना मिश्र, मस्र्याङदी गाउँपालिकाका निर्वाचन अधिकृत उदयराज काफ्ले, शसस्त्र प्रहरी नायव उपरीक्षक नवराज थापा, प्रमुख अनुसन्धान अधिकृत कुमार बुढाथोकीलगायतको उपस्थिति थियो ।
एमाले सिद्धार्थनगर प्रतिबद्धतापत्र सार्वजनिक
भैरहवा, बैशाख १० गते । नेकपा सिद्धार्थनगर नगर कमिटीले स्थानीय निर्वाचन २०७९ प्रतिबद्धता पत्र सार्वजनिक गरेको छ । यहीँ बैशाख ३० गते हुन लागेको स्थानीय तहको निर्वाचनलाई लक्षित गरी पार्टी स्थापना दिवसका अवसरमा एमालेले स्थानीय निर्वाचन प्रतिवद्धता पत्र सार्वजनिक गरेको हो । प्रतिवद्धता पत्र सार्वजनिक गर्दै एमालेले स्थानीय तहमा बिगतमा जस्तै सबै दल मिलेर गठबन्धन गरेता पनि एक्लै चुनाव जित्ने अठोट गरेको छ । नेकपा एमालेले स्थानीय निकायलाई स्थानीय तह, स्थानीय सरकारका रुपमा अधिकार सम्पन्न बनाउन २०४८ साल देखि स्थानीय स्वायत्त शासन ऐन बनाउन र कार्यान्वयन गर्न तथा स्थानीय तहलाई अधिकार सम्पन्न गराउने गरी संविधान निर्माणमा खेलेको भूमिका स्मरणीय रहेको जनाएको छ । एमालेले नगरको भौतिक स्तरोन्नती, पर्यटन प्रवद्र्धनको विकास देखि नेपाली कला, भाषा, साहित्य पत्रकारिताको विकास गर्ने गरी २६ बुँदे प्रतिबद्धता पत्र सार्बजनिक गरेको नेकपा एमाले सिद्धार्थनगर नगर कमिटीका अध्यक्ष चक्र बहादुर थापाले बताउनुभयो । कार्यक्रममा एमाले केन्द्रीय निर्वाचन आयोगका सदस्य भरत पोख्रेलले एमालेले बिगतमा गरेका अधिकांश प्रतिबद्धताहरु पुरा गरेको बताउँदै अबको निर्वाचनमा एमालेको जितसँगै सिद्धार्थनगरमा बाँकी रहेका विकास निर्माणका काम र भावी योजनाहरु पुरा गर्ने बताउनुभयो । एमाले लुम्बिनी प्रदेश सचिवालय सदस्य विश्वराज बरालले एमालेले बिगतमा बाचा गरेका प्रतिबद्धता अनुसार नगरले विकासमा फड्को मारेको बताउनुभयो । आगामी निर्वाचनमा एमालेलाई विजयी बनाउन आग्रह गर्दै बरालले नेपालको स्वाभिमानलाई थप बलियो बनाउनका निम्ती एमालेको विजयी अपरिहार्य रहेको बताउनुभयो । एमालेका रुपन्देही जिल्लाका उप–सचिव तथा प्रचार बिभाग प्रमुख हितराज पन्थीले नेकपा एमाले जनताको पार्टी भएकाले सदैव जनताको हितका लागि काम गरेको बताउनुभयो । उहाँलेसबै शक्ति मिलेर एमालेलाई हराउन लागे पनि त्यो सफल नहुने बताउनुभयो । एमाले रुपन्देही जिल्लाका सचिवालय सदस्य तथा सिद्धार्थनगर इन्चार्ज चोपलाल आचार्यले एमाले एक ढिक्का भएर चुनावमा जान लागेको बताउँदै सम्पूर्ण स्थानमा विजयी भएर जनताको काम गर्ने बताउनुभयो ।
उम्मेदवार टुंगो लगाउन एमाले सचिवालय बैठक बस्दै
काठमाडौं, बैशाख १० गते । महानगर र उपमहानगरपालिकामा उम्मेदवारको टुंगो लगाउन नेकपा एमालेको सचिवालय बैठक आज (शनिबार) मध्यान्न ३ बजे बस्ने भएको छ । स्थानीय तहको निर्वाचन नजिकिएसँगै एमालेले उम्मेदवारी टुंगो लगाउन आज (शनिबार) ३ बजे पार्टी अध्यक्ष केपी शर्मा ओली निवास बालकोट बैठक बस्ने भएको प्रचार विभागका उपप्रमुख विष्णु रिजालले जानकारी दिनुभयो । पार्टीले महानगर र उपमहानगरपालिकाको उम्मेदवारी टुंगो लगाएसँगै अन्य ७५३ वटै स्थानीय तहमा तत्काल उम्मेदवारीको नाम सार्वजनिक गर्ने तयारी समेत गरेको उहाँले गोरखापत्र अनलाइनलाई जानकारी दिनुभयो । प्रमुख दल मध्ये नेपाली कांग्रेस केन्द्रीय कार्यसम्पादन समितिको बैठक मध्यान्न ३ बजेनै बैठक बस्ने भएको छ । यो समितिले उम्मेदवारी टुंगो लगाउने पार्टीले जनाएको छ । अन्यदलले समेत उम्मेदवारीलाई टुंगो लगाउने गरी तयारी सुरु गरेको पाइएको छ । निर्वाचन आयोगले आइतबार र सोमबार मनोनयन दर्ताको कार्यक्रम सार्वजनिक गरी सकेको छ ।
काँग्रेस केन्द्रीय कार्यसम्पादन समितिको बैठक फेरि सर्यो
नेपाली काँग्रेसको केन्द्रीय कार्यसम्पादन समितिको बैठक फेरि सरेको छ । शनिबार बिहान ११ बजेका लागि तय भएको बैठक दिउँसो ३ बजेलाई सारिएको समितिका मुखय सचव कृष्णप्रसाद पौडेलले जानकारी दिनुभयो ।
पालिका अध्यक्षसहित १४ को राजीनामा
वैशाख ३० मा हुने स्थानीय तह निर्वाचनमा पार्टीले टिकट दिने पक्का भएपछि उम्मेदवारी दिन जनप्रतिनिधिहरुले राजीनामा दिन थाल्नुभएको हो । जिल्लाका दुई पालिका अध्यक्ष, वडाअध्यक्षसहितका सदस्यहरुले राजीनामा दिनुभएको छ ।
काँग्रेस केन्द्रीय कार्यसम्पादन समितिको बैठक शनिबार बस्ने
नेपाली काँग्रेस केन्द्रीय कार्यसम्पादन समितिको बैठक शनिबार बस्ने भएको छ । समितिका मुख्य सचिव कृष्णप्रसाद पौडेलले शुक्रबार दिउँसो २ बजेको लागि बोलाइएको बैठक शनिबार बिहान ११ बजेका लागि सरेको जानकारी दिनुभयो ।
चुनाव लड्न २० जना शिक्षकले जागिर छाडे
शेरबहादुर राईओखलढुङ्गा, वैशाख ९ गते । बैशाख ३० मा हुने स्थानीयतहको निर्वाचनमा उम्मेदवारी दर्ता गर्नका लागि ओखलढुङ्गाका २० जना शिक्षकले जागिरबाट राजीनामा दिएका छन् । स्थानीय तहको निर्वाचनको मिति घोषणा भएसँगै २० जना शिक्षकले जागिरबाट राजीनामा दिनुभएको शिक्षा विकास तथा समन्वय एकाइ प्रमुख नेत्रप्रसाद गजुरेलले बताउनुभयो ।देवी आधारभूत विद्यालय मानेभञ्ज्याङका शिक्षक रामचन्द्र महतो, सरस्वती आधारभूत विद्यालय रावादोलुका रामबहादुर बस्नेत, कालिका आधारभूत विद्यालय आहालेका शिक्षक चन्द्र कटुवाल, जेसे माध्यमिक विद्यालय पात्लेका गुन्जबहादुर सुनुवार, बालज्योति माध्यमिक विद्यालय चित्रेका शिक्षक मधुकरप्रसाद चौधरी, जन्तरखानी माध्यमिक विद्यालय जन्तरखानीका प्रधानाध्यापक मेखबहादुर मगरको राजीनामा स्वीकृत भएको एकाइ प्रमुख गजुरलले जानकारी दिनुभयो । यस्तै हिमगंगा माध्यमिक विद्यालय रावादोलुका शिक्षक डिल्लीराम बस्नेत, तिलक विश्वकर्मा र टोपबहादुर बस्नेत लगायत हर्कपुर माध्यमिक विद्यालय मानेभञ्ज्याङका गोविन्दप्रसाद अधिकारी, कालिका आधारभूत विद्यालय चुहानछापका शिक्षक जयकुमार कार्की, कालिका आधारभूत विद्यालयका भालुथुम्काका शिक्षक युवराज घिमिरेको पनि राजिनामा स्वीकृत भएको छ । सोडान्तर आधारभूत विद्यालय मानेभञ्ज्याङका होमप्रसाद दाहाल, भुमेथान आधारभूत विद्यालयका शिक्षक तोयानाथ काफले, चन्चला आधारभूत विद्यालय खोदम्पाका शिक्षक बालकुमार खड्का र जन्तरखानी मावि जन्तरखानीका शिक्षक शङ्खवीर राईले राजीनामा दिनुभएको शिक्षा विकास तथा समन्वय एकाइ ओखलढुङ्गाले जनाएको छ ।
जसपा र माओवादीमा असन्तुष्टि
नेपालगञ्ज समाचारदातानेपालगञ्ज, वैशाख ९ गते । सत्ता साझेदार पाँचदलीय गठबन्धनले नेपालगञ्ज उपमहानगरपालिकाको बारेमा गरेको सहमतिप्रति जनता समाजवादी पार्टी बाँके र नेकपा माओवादी केन्द्र नेपालगञ्जले असन्तुष्टि जनाएका छन् । केन्द्रले नेपालगञ्जको मेयर नेपाली काँग्रेस र उपमेयर जसपालाई दिने सहमति गरेपछि बाँकेका जसपा र माओवादीले कडा आपत्ति प्रकट गर्दै सच्चाउन चेतावनी दिएका छन् । जनता समाजवादी पार्टी बाँकेले जिल्लाका चारवटा पालिकामा कसैसँग गठबन्धन नगरी एक्लै निर्वाचनमा जाने निर्णय गरेर केन्द्रमा पठाए पनि बेवास्ता गरेर उपमेयरमा सहमति गरिएको जनाउँदै त्यसलाई नमान्ने घोषणा गरेर सबै ठाउँमा उम्मेदवारी दिने जनाएको छ । जसपा बाँकेका अध्यक्ष कमरुद्दीन राईले आफूहरूले केन्द्रको गलत निर्णय कुनै पनि हालतमा नमान्ने जनाउँदै सो सहमति नसच्याए विद्रोह गर्ने चेतावनी दिनुभयो । उहाँले पार्टीले नमाने अर्को चुनाव चिह्नबाट पनि निर्वाचनमा जाने तयारी भइरहेको बताउनुभयो । उक्त निर्णय नसच्याए पार्टीका सबै नेता कार्यकर्ताले सामूहिक राजीनामा दिने पनि जसपा बाँकेले जनाएको छ । सोही प्रकारले उक्त सहमतिको नेकपा माओवादी केन्द्र नेपालगञ्जले पनि कडा विरोध गरेको छ । माओवादीको नेपालगञ्ज नगरकमिटीले बैठक गरेर माओवादीलाई बाइपास गरेर कुनै पनि स्थान नदिई अपमान गरिएको ठहर गरेर सहमति सच्चाउन माग गरेको छ । नेपालगञ्जमा माओवादीको पकड राम्रो रहेको निष्कर्ष निकाल्दै बैठकले सो सहमति हटाएर बरु गठबन्धनभित्रका सबैले मित्रवत् प्रतिस्पर्धा गर्ने छुट दिनुपर्ने ठहर गरिएको माओवादी केन्द्र नेपालगञ्जका अध्यक्ष रतन शाहीले बताउनुभयो । उहाँले सहमति फेरबदल नगर्ने हो भने माओवादीले वैकल्पिक गठबन्धन गर्न सक्ने चेतावनी दिनुभयो । केन्द्रले गरेको नेपालगञ्ज उपमहानगरको सहमतिप्रति जसपा र माओवादी केन्द्रले असहमति जनाइसकेपछि यहाँ सो गठबन्धन नहुने देखिएको छ । नेपालगञ्ज उपमहानगरमा गत निर्वाचनमा राप्रपाले जितेकोले गठबन्धनभित्रका सबै दललाई मित्रवत् प्रतिस्पर्धा गर्ने छुट दिनुपर्ने अधिकांशको माग छ ।
काँग्रेस बैठक आज
नेपाली काँग्रेसले स्थानीय तहका उम्मेदवार तय गर्नका लागि केन्द्रीय कार्यसम्पादन समितिको बैठक बोलाएको छ । नेपाली काँग्रेसका मुख्य सचिव कृष्णप्रसाद पौडेलले बिहीबार जारी गर्नुभएको विज्ञप्तिअनुसार केन्द्रीय कार्यसम्पादन समितिको बैठक शुक्रबार बस्ने भएको छ ।
‘एक स्वरमा अगाडि बढ्छौँ’
गोरखापत्र समाचारदाताकाठमाडौँ, वैशाख ९ गते । नेपाल कम्युनिस्ट पार्टी (एमाले)का अध्यक्ष केपी शर्मा ओलीले आसन्न स्थानीय तह निर्वाचनमा पार्टी एक स्वरमा अगाडि बढ्ने बताउनुभएको छ । एमाले केन्द्रीय सल्लाहकार परिषद्को बिहीबार आयोजित कार्यक्रमलाई सम्बोधन गर्दै उहाँले स्थानीय तहको निर्वाचनबाट समान कदमका साथ, एक ताल, एक सुर, एक लयमा अगाडि बढ्ने बताउनुभयो । उहाँले पार्टी एक सुर र एक तालमा हिँडेकाले मुलुकको प्रमुख शक्तिको हैसियत कायम राखेको दाबी गर्नुभयो । एमाले अध्यक्ष ओलीले देशमा एमालेको लहर सिर्जना भइसकेको भन्दै मुलुकका सबै क्षेत्रबाट एमालेको पक्षमा मतदान हुने बताउनुभयो । विगतका निर्वाचनमा तराईमा एमालेलाई प्रवेश निषेध गरिएको उल्लेख गर्दै उहाँले अहिले तराई मधेसमा एमालेको लहर आएको बताउनुभयो । उहाँले भन्नुभयो, “अहिले मधेस प्रदेशमा एमालेको बलियो गढ बनेको छ । मधेसबाटै एमालेले स्थानीय तहको निर्वाचनमा बहुमत ल्याउनेछ ।”
तोकिएको समयमा नै निर्वाचन हुन्छ : प्रचण्ड
अविनाश चौधरीधनगढी, वैशाख ८ गते । नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल (प्रचण्ड)ले तोकिएको समयमा नै स्थानीय तहको निर्वाचन हुने बताउनुभएको छ । प्रेस सेन्टर कैलालीले आज (बिहीबार) धनगढी विमानस्थलमा आयोजना गरेको पत्रकार सम्मेलनमा उहाँले वैशाख ३० गते नै स्थानीय तहको निर्वाचन हुने बताउनुभएको हो । गठबन्धनले चुनाव सार्छन् कि भनेर कतिपयले हल्ला चलाएको उल्लेख गर्दै उहाँले चुनाव नसर्ने र तोकिएको मितिमै हुने बताउनुभयो । ‘हिजोमात्रै देशभरिकै सबै नगरपालिका र उपमहानगरपालिकामा सहमतिको टुङ्गो लागिसकेको छ’, प्रचण्डले भन्नुभयो । ‘अब त केही कन्फ्युजन छैन नि ?’ स्थानीय तहको निर्वाचनबाट लोकतन्त्रको अभ्यासलाई नयाँ स्तरमा उठाउन आवश्यक रहेको उहाँको भनाइ थियो । प्रचण्डले निर्वाचनलाई स्वच्छ, निष्पक्ष र धाँधलीरहित बनाइने बताउनुभयो । पूर्व प्रधानमन्त्रीसमेत रहनुभएका उहाँले अर्थमन्त्री जनार्दन शर्माले राजीनामा दिने वा नदिने विषयमा वैशाख १३ पछिमात्रै टुङ्गो लाग्ने बताउनुभयो । गभर्नर हटाइएको विषयमा अदालतले दुवै पक्षलाई १३ गते बोलाएको प्रचण्डको भनाइ थियो । कैलालीको गौरीगङ्गा नगरपालिकामा माओवादीले आज आयोजना गरेको सभालाई सम्बोधन गर्न प्रचण्ड कैलाली पुग्नुभएको हो ।
नेकपा (एमाले) सचिवालय बैठक बस्दै
काठमाडौं, बैसाख ८ गते । नेकपा (एमाले) केन्द्रीय सचिवालयको बैठक विहीबार (आज) दिउँसो १ बजे बस्ने भएको छ । बैशाख ३० गतेको स्थानीय तहको निर्वाचनमा महानगर तथा उपमहानगरका उम्मेद्वारका विषयमा छलफल गर्ने गरी पार्टी अध्यक्ष केपी शर्मा ओली निवास बालकोट बैठक बस्ने नेकपा एमाले प्रचार विभागका उपप्रमुख विष्णु रिजालले जानकारी दिनुभयो । त्यस्तै गरी नेकपा (एमाले) केन्द्रीय सल्लाहकार परिषद्को प्रथम बैठक आजनै विहान ११ वजे शंखमूल स्थित ए वान पार्टी प्यालेसमा बस्ने गोरखापत्र अनलाइनलाई रिजालले जानकारी दिनुभयो । अध्यक्ष केपी शर्मा ओलीको उपस्थितिमा बस्ने परिषद्को बैठक निर्वाचनका विषयमै केन्द्रीत हुने उहाँले बताउनुभयो ।
निर्वाचनमा काँग्रेस एक्लै लडेपनि गन्तव्यमा पुग्छ – डा. कोइराला
काठमाडौं, वैशख ८ गते । सत्तारुढ दल नेपाली काँग्रेसका नेता डा. शेखर कोइरालाले वैशाख ३० गते हुने स्थानीय तहको निर्वाचनमा काँग्रेस एक्लै लडेपनि निर्वाचनमा पुग्ने आत्मविश्वास रहेको बताउनुभएको छ । नेपाल विद्यार्थी संघको ५३ औं स्थापना दिवसको अवसरमा स्थानीय निर्वाचनमा नेवि संघको भूमिका र पार्टीको दायित्व विषयक विचार गोष्ठीमा उहाँले स्थानीय निर्वाचनमा काँग्रेसले अन्य दलसँग गठबन्धन गर्न आवश्यक नरहेको धारणा राख्नुभयो ।निर्वाचनमा आज के कारणले र किन हामी गठबन्धन गरेर अगाडि गइरहेका छौं ? भन्ने प्रश्न उहाँले गर्नुभयो । काँग्रेसको केन्द्रीय समितिले समेत निर्णय गरिसकेको अवस्थामा गठबन्धनका शीर्ष नेताहरुबीच यस्तो निर्णय भएकोप्रति उहाँले असन्तुष्टि व्यक्त गर्नुभयो ।राष्ट्रियता, प्रजातन्त्र र समाजवाद पार्टीको सिद्धान्त रहेको विषय उल्लेख गर्नुहुदै उहाँले निर्वाचनमा घर–घर गएर काँग्रेसको उम्मेदवार विजयी गराउन पनि उहाँले आव्हान गर्नुभयो ।काँग्रेसको कुरा गर्दा बीपी कोइराला, किसुनजी, गणेशमान सम्झनुपर्छ, काँग्रेसको पृष्ठभूमि अरुभन्दा भिन्नै छ, उहाँले भन्नुभएको छ ।
काँग्रेस एक्लै निर्वाचनमा जानुपर्नेमा नेताहरूको जोड
नेपाली काँग्रेसका नेताहरूले आगामी स्थानीय तहको निर्वाचनमा गठबन्धन नगरी एक्लै निर्वाचनमा जानुपर्नेमा जोड दिनुभएको छ ।नेपाल विद्यार्थी सङ्घको ५३औँ स्थापना दिवसका अवसरमा स्थानीय निर्वाचनमा नेपाल विद्यार्थी सङ्घको भूमिका र पार्टीको दायित्व विषयक विचार गोष्ठीमा नेपाली काँग्रेसमा अधिकांश नेताले थपिएका नयाँ मतदाताको समर्थन बटुलेर एक्लै निर्वाचनको गन्तव्यमा जान सकिने जनाउनुभएको हो ।
सत्तारुढ दलबीच चुनावी तालमेल गरेर जाने सहमति
सत्ता साझेदार पाँच दलबीच स्थानीय तह निर्वाचनमा महानगरपालिका र उपहानगरपालिकामा चुनावी तालमेल गरेर जाने सहमति भएको छ । प्रधानमन्त्री एवं नेपाली काँग्रेसका सभापति शेरबहादुर देउवाको अध्यक्षतामा बसेको बैठकले सो सहमति गरेको हो ।
राप्रपाको चुनावी प्रतिबद्धता सार्वजनिक
राष्ट्रिय प्रजातन्त्र पार्टी (राप्रपा)ले वैशाख ३० गते हुने स्थानीय तहको चुनावी प्रतिबद्धता पत्र बुधबार सार्वजनिक गरेको छ।
पानीको महसुलमा दुई सय मिनाहा, हरेक पालिकामा चक्रपथ
जनता समाजवादी पार्टी (जसपा)ले स्थानीय तह निर्वाचनका लागि घोषणापत्र सार्वजनिक गरेको छ । जसपाको १६ पृष्ठ लामो निर्वाचन घोषणापत्रमा पानीको महसुल २०० रुपियाँसम्म मिनाहा गर्ने उल्लेख छ ।
सत्ता गठबन्धनको बैठक बालुवाटारमा जारी
सत्ता गठबन्धनको बैठक बालुवाटारमा जारी छ । प्रधानमन्त्रीका प्रेस प्रमुख गोविन्द परियारले बुधबार बिहान साढे ११ बजेदेखि बैठक जारी रहेको जानकारी दिनुभयो ।
कास्की काँग्रेस कार्यालयमा महानगर समितिद्वारा तालाबन्दी
सन्तोष सुवेदीकास्की, वैशाख ७ गते । सत्तारुढ गठबन्धनबीच पोखरा महानगरपालिकाको मेयर पद नेकपा (एकीकृत समाजवादी)लाई दिने सहमतिपछि नेपाली काँग्रेस कास्की कार्यालयमा तालाबन्दी गरिएको छ । काँग्रेसको पोखरा महानगर समितिले बुधबार जिल्ला कार्यालय, चिप्लेढुङ्गामा ताला लगाएको हो ।महानगरका सचिव टुवराज बास्तोला र गणेशबहादुर थापाले संयुक्त विज्ञप्ति जारी गरी तालाबन्दीको निर्णय गरेका हुन् । उहाँहरूले जिल्ला कार्यसमितिसँग मात्रै सोधेर पोखराको मेयर एकीकृत समाजवादीलाई सुम्पेको भन्दै आफ्नो आत्मसम्मानमा चोट पुगेको बताउनुभएको छ । विज्ञप्तिमा भनिएको छ, ‘‘प्रदेश र जिल्ला सभापतिलाई किनाराको साक्षी राख्दै नेकपा एसलाई मेयर पदमा प्रस्ताव गरिएको समाचारले महानगर समिति उपेक्षित भएको महसुस भएको छ । हामी पनि विधानअनुसार निर्वाचित भएका हौं । यस्ता निर्णयले काँग्रेसका पहरेदार सिपाहीहरूको आत्मसम्मानमा गम्भीर चोट लागेको छ ।’’सत्ताभन्दा माथि उठेर आमकार्यकर्ताको मनोभावना उच्च राख्न महानगरले जिल्लाको पार्टी कार्यालयमा तालाबन्दी गरेको सचिव थापाले बताउनुभयो । ‘आगामी दिनमा अपनाइने सङ्घर्षका कार्यक्रममा आमसहमति रहने अपेक्षा गर्दै यो ध्यानाकर्षण पत्र जिल्ला कार्यसमिति एवं गण्डकी प्रदेश कार्यसमितिलाई पेस गर्दर्छौं,’ विज्ञप्तिमा भनिएको छ ।
साझा उम्मेदवारीको कार्यविधि तय
अशोक अधिकारीकाठमाडौँ, वैशाख ७ गते । आसन्न स्थानीय तहको निर्वाचनमा देशका छ महानगरपालिका र ११ उपमहानगरपालिकामा चुनावी तालमेलको विषयमा सत्ता साझेदार पाँच दल निर्णयको अन्तिम चरणमा पुगेका छन् । प्रधानमन्त्री निवास बालुवाटारमा मङ्गलबार दुई चरणमा सम्पन्न सत्ता साझेदार दलको बैठकले महानगर र उपमहानगरका साझा उम्मेदवार तय गर्ने र कार्यविधि बनाउने कार्यलाई अन्तिम रूप दिएका हुन् । सोमबारदेखि नै निर्णायक छलफलमा जुटेका सत्तारूढ दलहरू नेपाली काँग्रेस, नेपाल कम्युनिस्ट पार्टी (माओवादी केन्द्र), नेपाल कम्युनिस्ट पार्टी (एकीकृत समाजवादी), जनता समाजवादी पार्टी नेपाल र राष्ट्रिय जनमोर्चाका शीर्ष नेताहरूले मध्यरातसम्मको छलफलपछि चुनावी तालमेलको खाका तयार गर्नुभएको हो तर यो समाचार तयार पार्दा राति १ः०० बजेसम्म समझदारीपत्रमा हस्ताक्षर भइनसकेको माओवादी केन्द्रका नेता देवप्रसाद गुरुङले जानकारी दिनुभयो । सञ्चार तथा सूचना प्रविधिमन्त्री ज्ञानेन्द्रबहादुर कार्कीले पहिलो चरणको छलफलपछि चुनावी तालमेलको विषयमा सत्तारूढ दलहरू निष्कर्ष नजिक पुगेको बताउनुभयो । बैठकमा सहभागी एकीकृत समाजवादीका उपमहासचिव डा. विजय पौडेलका अनुसार छ महानगरमध्ये तीनवटा नेपाली काँग्रेसलाई र अन्य तीनवटा क्रमशः माओवादी केन्द्र, एकीकृत समाजवादी र जनता समाजवादी पार्टीलाई दिने गरी छलफल केन्द्रित छ । त्यसैगरी, ११ उपमहानगरपालिकामध्ये सातवटाको नेतृत्व नेपाली काँग्रेस, दुईवटा माओवादी केन्द्र र एक–एकवटा एकीकृत समाजवादी र जनता समाजवादी पार्टीले लिने गरी छलफल भएको उहाँले बताउनुभयो । डा. पौडेलले भन्नुभयो, “काठमाडौँ महानगरपालिकासहित ललितपुर र विराटनगरको नेतृत्व काँग्रेसलाई, भरतपुर माओवादी केन्द्रलाई, पोखरा एकीकृत समाजवादीलाई र वीरगञ्ज जनता समाजवादीलाई दिने गरी छलफल भइरहेको छ ।”त्यसैगरी, उपमहानगरपालिकातर्फ इटहरी, धरान, बुटवल, कलैया, तुलसीपुर, नेपालगञ्ज र धनगढीको प्रमुख पद काँग्रेसले लिने गरी छलफल भइरहेको उहाँले बताउनुभयो । जितपुर सिमरा र घोराही माओवादी केन्द्रलाई, हेटौँडा एकीकृत समाजवादीलाई र जनकपुर जनता समाजवादीलाई दिने गरी सहमति नजिक पुगेको उहाँले बताउनुभयो ।प्रधानमन्त्री निवासमा दुई चरणमा सम्पन्न बैठकमा प्रधानमन्त्री एवं नेपाली काँग्रेसका सभापति शेरबहादुर देउवा, सत्तारूढ दलसम्बद्ध निर्वाचन तयारी तथा अनुगमन समितिका संयोजक रामचन्द्र पौडेल, काँग्रेस उपसभापति पूर्णबहादुर खड्का, नेता कृष्णप्रसाद सिटौला, माओवादी केन्द्रका अध्यक्ष पुष्पकमल दाहाल प्रचण्डसहित नेताहरू नारायणकाजी श्रेष्ठ, वर्षमान पुन र देवप्रसाद गुरुङ सहभागी हुनुहुन्थ्यो । त्यसैगरी एकीकृत समाजवादीका अध्यक्ष माधवकुमार नेपाल, महासचिव डा. वेदुराम भुसाल, उपमहासचिव डा. विजय पौडेल, जनता समाजवादी पार्टी नेपालका सङ्घीय परिषद् अध्यक्ष डा. बाबुराम भट्टराई, अध्यक्ष उपेन्द्र यादव र वरिष्ठ नेता अशोककुमार राई तथा राष्ट्रिय जनमोर्चाका नेता हिमलाल पुरीसहित पाँच दलका नेताहरू सहभागी हुनुहुन्थ्यो । काठमाडौँ, वैशाख ७ गते ।काठमाडौँ, वैशाख ७ गते ।
सत्ता गठबन्धनको बैठक : छलफल सहमति नजिक
चुनावी तालमेलको विषयमा छलफल गर्न बसेको सत्ता गठबन्धनको बैठक निष्कर्ष नजिक पुगेको छ।
