बेवारिसे शवको आँखाको नानी झिकिँदैन


सरोज आचार्य

काठमाडौँ, माघ ५ गते । पशुपतिमा विद्युतीय शवदाह यन्त्र सञ्चालन भएयता आँखाको नानी सङ्कलनमा सहयोग पुगेको छ । मृतकका आफन्तमा आँखा दानप्रति सचेतना बढेकाले नानी सङ्कलनमा सहयोग पुग्दै आएको हो ।
नेपाल आँखा बैङ्क तिलगङ्गाका प्रबन्धक शङ्खनारायण त्वयनाले विद्युतीय शवदाह क्षेत्रबाट महिनामा सरदर १५ जनाको आँखाको नानी सङ्कलन भइरहेको जानकारी दिनुभयो । विद्युतीय शवदाह प्रयोगमा आउनुभन्दा पहिले नानी सङ्कलन कमै हुन्थ्यो ।
विराटनगर आँखा अस्पतालका निर्देशक डा. सन्देश सिंहका अनुसार वर्षमा आठ हजार नानी आवश्यक पर्ने गरेको छ तर देशभर सरदर वार्षिक आठ सयको सङ्ख्यामा नानी प्राप्त भइरहेको छ ।
गत वर्ष आँखा बैङ्कमा ८१६ नानी प्राप्त भएका थिए । तीमध्ये ७५९ नानी प्रत्यारोपण गरिएको थियो भने बाँकी तालिम र अध्ययनका लागि प्रयोग गरिएका थिए । त्रिभुवन विश्वविद्यालय चिकित्साशास्त्र अध्ययन संस्थान फरेन्सिक विभागमा दुर्घटना, आत्महत्या वा अन्य कारणबाट प्राप्त शवबाट झिकिएका मासिक १५ वटा आँखाका नानी पनि आँखा बैङ्कलाई उपलब्ध गराइने गरिएको छ । आँखा बैङ्कका प्रबन्धक त्वयनाले बेवारिसे शवका आँखाबाट नानी झिक्ने नगरिएको बताउनुभयो । झिकिएका नानी प्रत्यारोपणयोग्य छ छैन भन्ने अनुसन्धानपछि मुलुकका सबै आँखा अस्पतालमा मागअनुसार पठाइने गरेको उहाँले बताउनुभयो ।
बेवारिसे शवबाट आँखा झिक्ने पद्धति नभएको पशुपति गुठी गोश्वारा प्रमुख लछुना शर्मा काफ्लेले बताउनुभयो । “पशुपति वृद्धाश्रमबाट पाँच र पशुपति क्षेत्रमा मृत फेला परेका गरी गत वर्ष २२ शव गोश्वाराको खर्चमा दहन गरिए तर यी शवबाट पनि नानी सङ्कलन हुन सके राम्रो हुन्थ्यो,” उहाँले भन्नुभयो ।
विद्युतीय शवदाह गृहका प्रमुख एवं पशुपति क्षेत्र विकास कोषका प्रशासकीय अधिकृत कुमार थापामगरले नानी सङ्कलनलाई अझै प्रभावकारी बनाउन आवश्यक रहेको तर त्यसमा सरोकार निकाय सबैको समन्वय जरुरी रहेको बताउनुभयो ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds