पानी नपर्दो न त घाम लाग्दो
छ याम ऐले त उदेकलाग्दो
धुम्मेर बस्दो दिन सङ्लिएर
आओस् नयाँ वर्ष नयाँ भएर ।
चलोस् हुरी जोड र तोडसाथ
बर्सात बर्सोस घनघोर प्रातः
हटोस् तुवाँलो दिन सङ्लिएर
आओस् नयाँ वर्ष नयाँ भएर ।
खसुन् पुराना सब पात पत्ता
छाओस् धराबिच नवीन सत्ता
नवीन नौलो लहरै लिएर
आओस् नयाँ वर्ष नयाँ भएर ।
लागुन् मुना फुल्न र फल्न फेरि
सुवास छर्दै र दिँदै सुसेली
सद्भावले सोच नयाँ भरेर
आओस् नयाँ वर्ष नयाँ भएर ।
खोला र नाला धमिला थिए ती
सङ्लेर छन् कञ्चन छन्दमा ती
स्वच्छन्दको छाल यतै लिएर
आओस् नयाँ वर्ष नयाँ भएर ।
छ मौनता यो अब झट्ट खुल्दै
ती कोपिला झैँ सब पट्ट फुक्दै
मान्छे हिँडुन् ती भुइँका उमेर
आओस् नयाँ वर्ष नयाँ भएर ।
जताततै छन् मनमा निराशा
हटाई एकेक जगाई आशा
उत्साह चारैतिर फैलिएर
आओस् नयाँ वर्ष नयाँ भएर ।
आचार होस् शुद्ध मिजास शुद्ध
यो बुद्धको देश बनून् प्रबुद्ध
हटून् हटून् भ्रष्ट लतारिएर
आओस् नयाँ वर्ष नयाँ भएर ।
हासेर निर्धा निमुखाहरूले
बोल्दा कसैलाई नडसून् अरूले
समान सम्मान खुसी लिएर
आओस् नयाँ वर्ष नयाँ भएर ।
-square-thumb.jpg)
-original-thumb.jpg)
