प्रवीण कुमार शर्मा
चन्द्रपुर (रौतहट), भदौ २४ गते । रौतहटको विभिन्न ठाउँमा मङ्गलबार जेनजीले प्रदर्शन सुरु गरेका छन् । बिहानै रौतहटको गौर चन्द्रनिगाहपुर सडक खण्डको शेख इद्रिस गेट नजिक, दुर्गाभगवतिको गंगापिपरा, कटहरिया, गरुडा,चन्द्रनिगाहपुर लगायतका ठाउँमा भेला भएर जेनजी युवाहरुले प्रदर्शन सुरु गरेका हुन् ।
चन्द्रनिगाहपुरको मुख्य सडक खण्ड अगाडि टायर बालेर प्रदर्शन गरिरहेका जेनजी युवाहरु इलाका प्रहरी कार्यालय हुँदै चन्द्रपुर नगरपालिका कार्यालय अगाडि पुगेर प्रदर्शन गरिरहेका छन् ।
त्यस्तै कटहरियामा जेनजी युवाहरुले इलाका प्रहरी कार्यालय अगाडि प्रदर्शन गरिरहेका छन् । जेनजी युवाहरु भेला भएर गरिरहेको प्रदर्शनमा बिद्यार्थी मार्न पाइँदैन लगायत विभिन्न नारा लगाइएको छ ।
