हरिकृष्ण शर्मा
मुक्तिनाथ (मुस्ताङ), साउन २६ गते । मुस्ताङको घरपझोङ गाउँपालिका–३, स्याङमा ट्याक्टर दुर्घटना हुँदा चालकको मृत्यु भएको छ । सदरमुकाम जोमसोमबाट फर्निचरको सामग्री बोकेर मार्फातर्फ जाँदै गरेको ग १ त ७५०२ नम्बरको ट्याक्टर अनियन्त्रित भएर दुर्घटना भएको हो ।
दुर्घटनामा गम्भीर घाइते भएका बागलुङ निसीखोला गाउँपालिका–५ का ३० वर्षीय चालक शेरबहादुर घर्ती मगरको प्रादेशिक अस्पताल जोमसोममा उपचारको क्रममा मृत्यु भएको जिल्ला प्रहरी कार्यालय मुस्ताङका प्रहरी निरीक्षक विकास खत्रीले बताउनुभयो ।
मृतक चालकको टाउको र मुखमा गम्भीर चोट लागेर अचेत अवस्थामा अस्पतालमा लगिएकोमा राति ९ बजे नै मृत घोषणा गरिएको थियो । दुर्घटनामा घाइते गोरखा धार्चे गाउँपालिका–५ माछीखोला निवासी ६० वर्षीय आशबहादुर गुरुङको उपचार भइरहेको छ । घाइते गुरुङको दुबै हातमा चोट लागेको अवस्थामा हाल खतरामुक्त रहेको प्रादेशिक अस्पताल जोमसोमले जनाएको छ । दुर्घटनाको अनुसन्धान भइरहेको प्रहरीले जनाएको छ ।
