सन्तोष दहित
दाङ, जेठ ९ गते । लुम्बिनी प्रदेश सभामा प्रदेश सरकारको तर्फबाट प्रस्तुत भएको वार्षिक नीति तथा कार्यक्रममाथि छलफल प्रारम्भ भएको छ । शुक्रबार छैठौं अधिवेशनको सातौं बैठकबाट आर्थिक वर्ष २०८२८३ को नीति तथा कार्यक्रममाथि छलफल प्रारम्भ भएको हो ।
मुख्यमन्त्री चेतनारायण आचार्यले बैठकमा नीति तथा कार्यक्रममाथि छलफल गरियोस् भन्ने प्रस्ताव पेश गर्नुभएको थियो । सोही प्रस्तावको आधारमा दलगत प्रतिनिधित्वको आधारमा प्रदेश सभामा छलफल जारी छ । लुम्बिनी प्रदेश सरकारले कृषि, उद्योग, पर्यटन, पूर्वाधार लगायतका क्षेत्रलाई प्राथमिकता राख्दै २०४ बुँदे वार्षिक नीति तथा कार्यक्रम ल्याएको छ।
प्रदेश प्रमुखको सम्बोधनप्रति प्रदेश सभा सदस्य तुलसीप्रसाद चौधरीले पेश गरेको धन्यवाद ज्ञापनको प्रस्तावलाई प्रदेश सभा सदस्य जमुना ढकालले समर्थन गर्नुभयो । प्रदेश सभाले धन्यवाद ज्ञापनको प्रस्ताव सर्वसम्मतिले पारित गरेको सभामुख तुलाराम घर्तीमगरले जानकारी गराउनुभयो ।
