रामकृष्ण बोहरा
बागलुङ, चैत्र २१ गते। गण्डकी प्रदेशकै प्रसिद्व शत्तिपिठ बागलुङ कालीका भगवती मन्दिर व्यवस्थापन समितिको आयोजनामा कालिका परिसरमा धार्मिक पर्यटन तथा गुठी महोत्सव सुरु भएको छ। चैतेदशैंको अवसर पारेर परम्पराकालदेखि लाग्दै आएको चैत्राष्टमी मेलासँगै यसवर्ष गुठी संस्थानको सहकार्यमा धार्मिक पर्यटन तथा गुठी महोत्सव सुरु भएको हो।
जानकी मन्दिरका उत्तराधिकारी रामरोशन दास, महोत्तरीको लक्ष्मीनारायण मठियानी मठका उत्तराधिकारी रविन्द्र दास वैष्णव, जनकपुर सिता कुण्डका महन्त रामनरेश दास, मन्दिर, बौद्व गुम्बाका पुजारी र गुठी व्यवस्थापन समितिका प्रतिनिधि गरी देशभरबाट १२० जना धार्मिक सम्मेलनमा सहभागी हुनुहुन्छ।
कालिका मन्दिरको तटमा रहेको पवित्र कालीगण्डकी नदीको स्नान गरी धार्मिक सम्मेलन सुरु भएको हो। सम्मेलनका सहभागीहरुले मन्दिर दर्शन, पाठ परायण, प्रवचन र धार्मिक पर्यटनको प्रवद्र्वन गर्ने उदेश्यले बागलुङका चर्चित तीर्थस्थल पञ्चकोट धाम, श्रीरंगवेंकटेश मुक्तीनारायण मन्दिर र शालिग्राम संग्राहलयको अवलोकन गर्नुभएको छ।
धार्मिक सम्मेलनमा चैत्राष्टमी मेलाको अवसरमा विगतमा विभिन्न खेलकुद तथा साँस्कृतिक कार्यक्रम हुने गरेपनि यसवर्ष भने धार्मिक पर्यटन महोत्सवलाई जोडिएको गुठीका अध्यक्ष तथा मेला व्यवस्थापन समितिका मुल संयोजक डा. कुमार खड्काले जानकारी दिनुभयो।
सम्मेलनलाई सम्बोधन गर्दै गण्डकी प्रदेशका मुख्यमन्त्री सुरेन्द्रराज पाण्डेले कला संस्कृतिको विकास र सम्वद्र्धन गर्न सके देशले आर्थिक रुपमा पनि फड्को मार्ने बताउनुभयो।
धार्मिक सम्मेलनको अवसरमा नेपाल मगर संघ, थकाली सेवा समिति, क्षेत्री समाज र कालिका भगवती भजन समूहले परम्पगत भेषभूषामा सजिएर साँस्कृतिक झाँकी तथा नेवार समुदायले लाखे नाच समेत प्रस्तुत गरेका छन्। समितिका अध्यक्ष खड्काले चैत २० गतेदेखि २५ गतेसम्म संचालन हुने धार्मिक पर्यटन तथा गुठी महोत्सवअन्तर्गत आजसम्म धार्मिक सम्मेलन हुने जानकारी दिनुभयो।
-original-thumb.jpg)
