राजश्व सङ्कलन अभियान सञ्चालन

बोमलाल गिरी

नवलपुर, चैत २१ गते । लक्ष्य अनुसार राजश्व सङ्कलन नभएपछि यातायात व्यवस्था कार्यालय नवलपुरले अभियान सञ्चालन गरेको छ । चालु आर्थिक वर्षभित्र ३५ करोड रुपियाँ राजश्व सङ्कलन गर्ने लक्ष्य राखिएको थियो । 

तर धेरै राजश्व उठ्ने चैत महिनासम्म जम्मा २० करोड मात्र राजश्व सङ्कलन भएपछि कार्यालयले कर उठाउन १५ दिने विशेष अभियान सञ्चालन गरेको हो । यो अभियान अन्तर्गत बिलबुक नवीकरण, जाँचपास, रूट परमिट तथा सवारीचालक अनुमति पत्रको चेकजाँचलाई विशेष प्राथमिकता दिइएको कार्यालय प्रमुख सुरेश जैसवालले बताउनुभयो । प्रदेश सरकारले राजस्व वृद्धि गर्ने लक्ष्यसहित कर संकलन प्रक्रियालाई चुस्त दुरुस्त बनाउन विशेष योजना अघि बढाएको उहाँले बताउनुभयो । “यातायात सेवालाई नियमित र पारदर्शी बनाउँदै कर संकलनका लागि अभियान सञ्चालन गरिएको छ,’’ जैसवालले भन्नुभयो । 

उहाँका अनुसार नवलपुरमा धेरै सवारीसाधनले लामो समयसम्म कर तिरेका छैनन् । त्यसलाई मध्यनजर गर्दै बिलबुक नवीकरण नगर्ने सवारीसाधनलाई कारबाहीको दायरामा ल्याउने उद्देश्यले अभियान सञ्चालन गरिएको हो । कागजात नवीकरण नगरेका तथा जाँचपास नगरी सञ्चालनमा रहेका सार्वजनिक सवारी साधनलाई चैत मसान्तसम्म कर बुझाउन आग्रह गरिएको जैसालले बताउनुभयो । साथै, रूट परमिटबिना सञ्चालनमा रहेका सवारीसाधनलाई प्रहरीले नियन्त्रणमा लिने काम पनि गरिरहेको छ । 

सेवाग्राहीलाई सहज सेवा प्रदान गर्न कार्यालयले विशेष व्यवस्था गरेको छ । कार्यालयका सूचना अधिकारी टेक नारायण तिवारीका अनुसार कर तिर्न आउने सेवाग्राहीको भीडलाई व्यवस्थित गर्न अतिरिक्त कर्मचारी पनि खटाइएको छ । 

“सेवा लिने क्रम छिटो होस् भन्ने उद्देश्यले छुट्टै काउन्टरको व्यवस्था गरिएको छ,’’ तिवारीले भन्नुभयो । साथै, कर तिर्दा आवश्यक पर्ने कागजात तथा अन्य जानकारी सहजै उपलब्ध गराउने व्यवस्था मिलाइएको उहाँले जानकारी दिनुभयो । यस अभियानले यातायात कर प्रणालीलाई थप पारदर्शी र व्यवस्थित बनाउने अपेक्षा गरिएको तिवारीको भनाइ छ ।

यातायात व्यवस्था कार्यालय नवलपुरले चालू आर्थिक वर्षको फागुन मसान्तसम्म २० करोड ७४ लाख ५ हजार ३५५ रुपियाँ मात्र राजस्व संकलन गरेको छ । अघिल्लो आर्थिक वर्षमा २९ करोड ३९ लाख ७ हजार ३५१ रुपियाँ राजस्व संकलन भएको थियो । यस वर्षको राजस्व सङ्कलनमा उल्लेखनीय गिरावट आएको छ । 

कार्यालयका अनुसार सवारी साधन दर्ता, नवीकरण, नवीकरण दस्तुर, जरिवाना तथा अन्य सेवा शुल्कबाट राजश्व सङ्कलन हुने गर्छ । तर चालू आर्थिक वर्षमा नयाँ सवारी साधन दर्ता गर्नेहरूको संख्या घटेको, नवीकरण प्रक्रिया ढिलो भएको र आर्थिक मन्दीका कारण नयाँ सवारी किन्न नसकेको कारण राजश्व कम उठेको हो । यातायात कार्यालयले बैशाखदेखि भने राजस्व सङ्कलनमा सुधार आउने जनाएको छ ।