काठमाडौँ, फागुन १८ गते । इटालीलाई सन् २००६ को फिफा विश्वकप जिताउने विश्वप्रख्यात गोलरक्षक जियानलुइजी बुफोन आइतबार नेपाल आइपुग्नुभएको छ ।
काठमाडौँमा जारी केपी ओली कप फुटबलको मुख्य पाहुनाको रूपमा बुफोनलाई नेपाल निम्त्याइएको हो । इटालीका महान फुटबलर बुफोनले नेपाल आउन पाउँदा आफू निकै खुसी भएको र सपना पूरा भएको बताउनुभएको छ ।
आइतबार आयोजित पत्रकार सम्मेलनमा बुफोनले आफूलाई नेपाल आउने अवर प्रदान गरेकोमा आयोजकलाई धन्यवाद समेत दिनुभयो ।‘‘सुन्दर देश नेपाल आउन पाउँदा उत्साहित भएको छु । आजको दिन म र मेरी श्रीमतीका लागि अवस्मरणीय रहेको छ । केपी ओली कपको फाइनल हेर्नका लागि निकै उत्साहित छु,’’ बुफोनले भन्नुभयो ।
सन् १९९८ देखि २०१४ सम्म लगातार पाँच वटा विश्वकप खेल्ने बुफोनले इटालीका लागि एक सय ७६ अन्तर्राष्ट्रिय खेल खेल्नुभएको छ । उहाँले इटालीका लागि मात्र ८० खेलमा कप्तानी गर्नुभएको छ ।
फाइनल खेल त्रिपुरेश्वरस्थित दशरथ रङ्गशालामा साँझ ६:०० बजे सुरु हुनेछ। मच्छिन्द्र उपाधिमा ह्याट्रिक गर्ने लक्ष्यमा छ । मच्छिन्द्रले यसअघिको दुवै संस्करण जितेको थियो । यस्तै आर्मी पहिलो पटक केपी ओली कप चुम्ने तयारीमा छ । सेमिफाइनलमा मच्छिन्द्रले आयोजक केपी ओली एफसीलाई तथा आर्मीले सङ्कटालाई हराएर फाइनल प्रवेश गरेको हो ।
फागुन ११ गतेदेखि सुरु भएको केपी ओली कपमा नौ टिमले प्रतिस्पर्धा गरेका थिए । प्रतियोगिताको विजेताले १५ लाख ११ हजार एक सय ११ र उपविजेताले पाँच लाख रुपियाँ पुरस्कार प्राप्त गर्नेछ ।
-square-thumb.jpg)
(1)-square-thumb.jpg)
