तीन तहकै निर्वाचन एकै पटक हुनुपर्छ : मन्त्री लेखी

धर्बेन्द्र झा 

जनकपुरधाम, फागुन ६ गते । मधेश प्रदेशका गृह सञ्चार तथा कानुनमन्त्री राजकुमार लेखीले तीन तहकै निर्वाचन एकै पटक हुनुपर्ने बताउनुभएको छ । राष्ट्रिय समाचार समितिको ६४ औं वार्षिकोत्सवको अवसरमा राष्ट्रिय समाचार समिति मधेश प्रदेश कार्यालयले मङ्गलबार जनकपुरधाममा आयोजना गरेको सुशासन, विकास तथा समृद्धिका लागि राससको भूमिका विषयक अन्तरक्रिया कार्यक्रममा उहाँले यस्तो बताउनुभएको हो । 

उहाँले देशको वर्तमान निर्वाचन प्रणाली खर्चिलो हुँदै गएको र सामान्य मान्छेलाई आउने दिनमा चुनाव लड्न समस्या हुने भन्दै एकै पटक तीनै तहको निर्वाचन हुँदा खर्च पनि कम लाग्ने बताउनुभयो । 

उहाँले सुशासनको कुरा गर्ने मान्छेको कार्यक्षेत्रमा सुशासन छकि छैन, भन्ने विषयमा सञ्चारमाध्यमहरूले निगराणी राख्नुपर्ने भन्दै कार्यक्षेत्रमा सुशासन नभएका व्यक्तिले सुशासनको कुरा गर्न नमिल्ने बताउनुभयो । 

उहाँले सुशासनको बारेमा बुझ्नु र बुझाउनु आवश्यक रहेको भन्दै सुशासन कायम गर्न प्रतिबद्ध हुनु जरुरी रहेको बताउनुभयो । उहाँले भन्नुभयो, “जहाँ सुगमता छैन, विकटता छ त्यहाँ शिक्षा, स्वास्थ्य, पर्यटनसहितको क्षेत्रमा राम्रो काम भएको छ । तर हामीतिर सुगमता भए पनि शिक्षा, स्वास्थय, पर्यटनसहितको क्षेत्रको अवस्था दयनीय छ ।”

उहाँले संविधानले अधिकार सम्पन्न बनाउनका लागि स्वेत प्रदेश, स्वेत क्षेत्र र स्वेत इलाकाको परिकल्पना गरे पनि यस विषयले समाचारमाध्यममा स्थान पाई नराखेको उहाँको भनाइ छ । मन्त्री लेखीले भन्नुभयो, “संविधानले जिल्ला प्रशासन कार्यालयलाई चिन्दैन, तर त्यहाँबाट कराेडौं रकम खर्च हुन्छ, त्यसैले संविधानले नचिन्ने कार्यालयको बारेमा बहस चलाउनुपर्ने आवश्यकता छ ।” 

उहाँले आफ्नो मन्त्रालयले चालु आर्थिक वर्षमा कम्तीमा ९० प्रतिशतभन्दा माथि बजेट खर्चिने किसिमले काम गरिरहेको बताउनुभयो । उहाँले राष्ट्रिय समाचार समितिले विगतमा पनि देश जनताका लागि भूमिका खेलेको भन्दै आगामी दिनमा पनि अझ परिस्कृत भएर कामकाज गर्न रासस टिमलाई शुभकामना दिनुभयो ।

राष्ट्रिय समाचार समिति मधेश प्रदेश कार्यालय जनकपुरधामका प्रमुख सुरेश झाको अध्यक्षतामा भएको उक्त कार्यक्रममा जिल्ला समन्वय समिति धनुषाका प्रमुख राजनन्दन मंडल, जनकपुरधाम उपमहानगरपालिका नगर प्रमुख मनोज साह, मिडिया काउन्सिलका कार्यबाहक अध्यक्ष कैलाश दास, आमसञ्चार प्राधिकरणका निवर्तमान अध्यक्ष श्यामसुन्दर यादव, नेपाल पत्रकार महासङ्घ धनुषाका अध्यक्ष पुरण साह, वरिष्ठ पत्रकार अजय झासहितकाले शुभकामना मन्तव्य राख्नुभएको थियो ।