रासस सप्तरीले मनायो ६४औं वार्षिकोत्सव

विनय कर्ण

कल्याणपुर (सप्तरी), फागुन ५ गते । राष्ट्रिय समाचार समिति (रासस) सप्तरीले सोमबार ६४औं वार्षिकोत्सव मनाएको छ । 'राससमा समावेशी पत्रकारिताको विकास’ विषयक अन्तरक्रिया कार्यक्रमको आयोजना गर्दै रासस जिल्ला कार्यालय सप्तरी, राजविराजले वार्षिकोत्सव मनाएको हो ।

रासस कार्यालय सप्तरीका प्रमुख शम्भु प्रसाद यादवको अध्यक्षतामा आयोजित कार्यक्रममा प्रमुख अतिथि राजविराज नगरपालिका कार्यवाहक नगरप्रमुख इसरत परवीनले स्थानीय तहमा पत्रकार सूचना लिन जाँदा कर्मचारीहरू डराउने गरेको बताउनुभएको छ । नियम प्रक्रियागत रूपमा काम गरेपछि सूचना दिन डराउन नहुने उहाँको भनाइ छ । “हामीले नियम प्रक्रियागत काम गरेका छौं । यदि गरेका छैनौं भने त्यो पनि जनता समक्ष आउनु पर्‍याे,” उहाँले भन्नुभयो ।

राजविराज नगरपालिकाकामा सूचना माग्न आउनेलाई प्रक्रियागत रूपमा उपलब्ध गराउन प्रमुख प्रशासकीय अधिकृतलाई निर्देशन दिएको उल्लेख गर्नुहुँदै विधि प्रक्रिया अपनाएर सूचना लिई भित्रको कुरा बाहिर जनता समक्ष पुर्‍याउन संचारकर्मीसँग आग्रह गर्नुभयो ।

कार्यक्रमका विशिष्ठ अतिथि नेपाल पत्रकार महासङ्घका अध्यक्ष श्रवणकुमार देवले पछिल्लो चरणमा युट्युवरहरूको कारण समगै पत्रकारिता बदनाम भइरहेको बताउनुभयो । उहाँले पत्रकारितामा आएको छाडापनलाई नियन्त्रण गर्नुपर्ने बताउनु हुँदै अनुशासनमा रहेर पत्रकार अचारसंहिताको पालना गरी मात्र पत्रकारिता गर्न आग्रह गर्नुभयो ।

कार्यक्रममा विशिष्ट अतिथि जिल्ला समन्वय समिति सप्तरीका उप–प्रमुख शम्भु यादव, प्रमुख जिल्ला अधिकारी भोला दाहाल, पूर्व अध्यक्ष विष्णुकुमार बैद्यनाथ झा, मुरलीप्रसाद यादव अग्रज पत्रकार अनिल अनल तथा गणेशलाल देव लगायतको सहभागिता थियो ।

यसैबिच सोही कार्यक्रममा नेपाल पत्रकार महासङ्घका अध्यक्ष श्रवणकुमार देव, पुर्व अध्यक्ष मुरलीप्रसाद यादव, अग्रज पत्रकार अनिल अनल, गणेशलाल देव लगायतकालाई दोसल्ला ओढाएर सम्मान गरिएको थियो ।