अमरराज नहर्की
तनहुँ, मङ्सिर ४ गते । तनहुँ समाज हङकङले तनहुँको ऋषिङ गाँउपालिका ८ पल्ट्याङस्थित बालशिक्षा निकेतन माध्यमिक विद्यालयमा ६ लाखको अक्षयकोष स्थापना गरेको छ ।
ऋषिङ घर भई हाल हङकङ निवासी समाजका सल्लाहकार लालबहादुर थापाको संयोजकत्वमा सङ्कलित ६ लाख रुपियाँले विद्यालयमा अक्षयकोष स्थापना गरिएको हो ।
अक्षयकोष वापतको रकम संयोजक थापाले सोमबार विद्यालयका प्रधानाध्यापक ढाकाराम पौडेललाई हस्तान्तरण गर्नुभएको हो । रकम हस्तान्तरण कार्यक्रममा समाजका पूर्व अध्यक्ष भीमराज गुरुङ र जङ्गबहादुर थापा तथा सल्लाहकार श्यामसुन्दर थापा उपस्थित हुनुहुन्थ्यो ।
संस्थाका सल्लाहकार थापाले अक्षय कोषको ब्याजबाट आउने रकमबाट विद्यार्थीको पठनपाठनमा मद्दत पुग्ने विश्वास व्यक्त गर्नुभयो । आफूले बाल्यकालमा पढेको विद्यालयलाई सहयोग गर्ने मौका पाएको भन्दै उहाँले खुसी व्यक्त गर्नुभयो ।
उहाँका अनुसार हङकङमा बसोबास गर्ने ५२ जना नेपालीको सहयोगमा उक्त रकम सङ्कलन गरिएको हो ।
रकम हस्तान्तरण कार्यक्रमका प्रमुख अतिथि गाउँपालिका प्रमुख राजेन्द्रकृष्ण श्रेष्ठले सामाजिक भावनाबाट उत्प्रेरित भई विदेशमा रहेर पनि आफ्नो मातृभूमिलाई सहयोग गरेको भन्दै समाजप्रति आभार व्यक्त गर्नुभयो । साथै सामुदायिक विद्यालयमा विद्यार्थीको सङ्ख्या क्रमशः घट्दै गएकोप्रति चिन्ता प्रकट गर्दै श्रेष्ठले पठनपाठनको प्रक्रियालाई थप सुधार्न शिक्षकहरुलाई अनुरोध गर्नुभयो । उहाँले भन्नुभयो, ‘‘पर्याप्त शिक्षक र पूर्वाधार हुँदाहुँदै पनि शिक्षाको गुणस्तर सुधार्न सकिएन भने हाम्रो लगानी व्यर्थ हुन्छ ।’’
विद्यालय व्यवस्थापन समितिका अध्यक्ष विष्णुमाया थापाको सभापतित्वमा सम्पन्न कार्यक्रममा शिक्षक अभिभावक सङ्घका अध्यक्ष बेलबहादुर परियार, विद्यालय व्यवस्थापन समितिका पूर्व अध्यक्ष तेजबहादुर थापा, विद्यालयका प्रधानाध्यापक ढाकाराम पौडेल लगायतले सहयोगप्रति आभार प्रकट गर्दै प्राप्त सहयोग सदुपयोग गरिने प्रतिबद्धता व्यक्त गर्नुभयो ।
उक्त अक्षय कोषको व्याजबाट प्राप्त रकम विद्यालयको अक्षय कोष कार्यविधि अनुसार ५-५ विद्यालयको उन्नन्यनमा खर्च गर्ने र ५-५ विद्यार्थीलाई छात्रवृत्रि प्रदान गरिने प्रअ पौडेलले जानकारी दिनुभयो । रकम हस्तान्तरण कार्यक्रममा शिक्षक मिलन श्रेष्ठले स्वागत गर्नुभएको थियो भने दीपक गैरेले कार्यक्रम सञ्चालन गर्नुभएको थियो ।
थापा परिवारले यस अघिनै सोही विद्यालयमा अक्षय कोष स्थापना गरेको छ । विद्यालय व्यवस्थापन समितिका सदस्यसमेत रहेका लालबहादुर थापाका भाइ टोलबहादुर थापालगायत ५ जना छोराछोरीद्वारा स्वर्गीय आमा लुरीमायाको स्मृतिमा लुरी मगर्नी अक्षयकोष स्थापना गरिएको विद्यालयले जनाएको छ ।
