मकवानपुर समाचारदाता
मकवानपुर, कात्तिक १३ गते । मकवानपुरे साहित्यकार डिबी बर्तौलाको मुक्तकसङ्ग्र्रह ‘उज्यालोका बाछिटा’ को विमोचन गरिएको छ । साहित्य सङ्गम मकवानपुरको आयोजनामा हेटौँडामा भएको ३४८ औँ नियमित साहित्य सन्ध्याको अवसरमा बर्तौलाको तेस्रो मुक्तकसङ्ग्रहको विमोचन गरिएको हो । साहित्य सङ्गम मकवानपुरका उपाध्यक्ष सानु खनालको अध्यक्षता तथा साहित्यकार आरसी रिजालको प्रमुख आतिथ्यमा भएको कार्यक्रममा सङ्ग्रहको विमोचन गरिएको थियो ।
सो क्रममा साहित्य सङ्गम मकवानपुरका अध्यक्षसमेत रहनुभएका बर्तौलाले आफ्नो कृतिमा समावेश भएको तीन वटा मुक्तक वाचन गर्नुभएको थियो । सङ्ग्रहमा ९२ वटा मुक्तक समावेश छन् । बर्तौलाको पहिलो मुक्तकसङ्ग्रह ‘आगतको आँगनी’ र दोस्रो मुक्तकसङ्ग्रह ‘पसिनाको आभा’ यसअघि सार्वजनिक भइसकेका छन् ।
