काठमाडौँ, भदौ १८ गते । एन्फा लिगमा चन्द्रपुर नगरपालिका र कर्णाली प्रदेशले बराबरी खेल्दै अङ्क बाँडेका छन् । ललितपुरको सातदोबाटोस्थित एन्फा मैदानमा मङ्गलबार भएको खेलमा चन्द्रपुर र कर्णालीले १–१ गोलको बराबरी खेल्दै अङ्क बाँडेका हुन् ।
खेलमा कर्णालीले सुरुवाती गोल गरेको थियो । छैटौँ मिनेटमा सुनकला राईले गोल गर्दै कर्णालीको उत्साह जगाउनुभयो । त्यसपछि पहिलो हाफको इन्जुरी समयमा चन्द्रपुरकी रजनी थोकरले गोल गर्दै खेललाई बराबरीमा ल्याउनुभयो ।
मङ्गलबार नै भएको अर्को खेलमा विभागीय टोली एपिएफ क्लब र नेपाल पुलिस क्लबले गोलरहित बराबरी खेल्दै अङ्क बाँडेको छ । महिला लिगमा १० टोलीको सहभागिता रहेको छ ।
