.jpeg)
खेमराज सापकोटा
रानी (विराटनगर), चैत २१ गते । बालिमा युरिया मल लगाउने मुख्य समयमा नै कृषकले मल नपाउँदा मोरङका कृषक चिन्तित बनेका छन् । मकै खेतीका लागि युरियामल लगाउने मुख्य समय रहेको र चैते धान रोपाइँको पनि सुरुवात हुँदासम्म कृषकले पर्याप्त मात्रामा मल पाउन सकेका छैनन् ।
बिहीबार सुन्दरहरैंचास्थित ग्लोबल एग्रो मार्ट प्रालिमा अनुदानका लागि आएको युरिया मल लिनका लागि आएका कृषकले पनि पर्याप्त मात्रामा मल पाउन सकेनन् । युरिया आएको सूचना प्राप्त गरेर मल लिन आउनुभएका सुन्दरहैंचाका कृषक इन्द्रबहादुर खत्रीले मल प्राप्त गर्न नसकेको गुनासो गर्नुभयो ।
उहाँ भन्नुहुन्छ, ‘‘मल त एक बोरा नै चाहिएको छ । तर यहाँ लाइन हेर्दा २० किलो पनि पाउँन मुस्किल भयो ।’’ यस्तो हाहाकार बिना नै कृषकलाई सरकारले समयमै सहज ढङ्गले मल उपलब्ध गराउन सक्नुपर्ने स्थानीय दिपा कटुवाल बताउनुहुन्छ ।
जिल्लाका मल वितरण गर्ने संस्थाहरु अनुदानमा आउने मलको अभावका कारण कृषकलाई वितरण गर्न नसकिएको बताउछन् । कृषकलाई अनुदानको मल वितरण गर्दै आएका संस्थाहरु मल आउँदा नै थोरै मात्रामा आएको र कृषकको चाप हेरेर त्यसैअनुसार बाँड्ने भएकाले पुग्ने अवस्था नभएको उनिहरु बताउछन् ।
प्रदेशमा मल आइनसकेकाले कृषकहरुले मल प्राप्त गर्न नसकेको विराटनगरस्थित कोशी प्रदेशको उद्योग, कृषि तथा सहकारी मन्त्रालयका कृषि प्रचार अधिकृत अभिमन्यु अधिकारी बताउनुहुन्छ । चैत महिनाभित्र कलकत्ता बन्दरगाहबाट मल लोड भएर आउने भएकाले प्रदेशलाई मल प्राप्त हुनसाथ वैशाख पहिलो साताबाट वितरण सुरु गर्न सकिने उहाँको भनाइ छ ।
उहाँका अनुसार पनि विराटनगरसहित प्रदेशभरी नै युरिया मल सकिएको अवस्था छ । खासगरी प्रत्येक वर्ष समयमा मल प्राप्त गर्न नसक्दा कृषकलाई चिन्ता थपिने गरेको छ । सरकारले समयमा मलको उपलब्ध गराउन सक्नुपर्नेमा कृषि क्षेत्रका जानकारहरु बताउदछन् ।
