बिष्णुप्रसाद पोखरेल
दमक, असार १४ गते। झापाको गौरीगन्ज गाँउपालिकामा कमल खोलाले बगाएर बिहीबारदेखि बेपत्ता भएका लखिराम मुर्मुको शव भेटिएको छ।
गौरीगन्ज गापालिका माहाभाराका ५० वर्षीय लखिराम मुर्मुलाई सानो कमल खोलाले बिहीबार दिउँसो करिब ३ बजे बगाएको थियो। प्रहरीका अनुसार नुहाउन खोलामा पसेका मुर्मुलाई खोलाले बगाएको हो।
जिल्ला प्रहरी कार्यालय झापाका अनुसार मुर्मुको शव शुक्रबार बिहान बगाएको भन्दा पाँच सय मिटर टाढा घोप्टो परेको अवस्थामा भेटिएको हो। घटनाको सम्बन्धमा आवश्यक अनुसन्धान भइरहेको प्रहरीले जनाएको छ।
यसैगरी बुधबार साँझदेखि बनियानी खोलामा हराएका एक बालक शुक्रबार अबेरसम्म फेला पर्न नसकेको प्रहरीको भनाइ छ। तीन दिनदेखि १२ वर्षीय मिलन बिकको अवस्था अज्ञात छ।
नेपाल रेडक्रस सोसाइटी झापा शाखाका अध्यक्ष लोकराज ढकालका अनुसार बालकको खोजी कार्यका लागि जिल्ला विपद् व्यवस्थापन समितिले सबै सरोकारवाला निकायलाई निर्देशन दिएर खोजी कार्यलाई तीव्र बनाएको छ।
